Mınıstr oqý jylyna daıyn emes óńirlerge eskertý jasady

ASTANA. QazAqparat – Oqý-aǵartý mınıstri Ǵanı Beısembaev birneshe óńirdiń oqý jylyna daıyndyq barysyn synǵa alyp, eskertý jasady, dep habarlaıdy QazAqparat tilshisi.

«Oqýshylardy jańa oqý jylynda qaýipsiz ári taza mekteppen jáne qajetti qural-jabdyq, oqýlyqtarmen qamtý asa mańyzdy. 1 qyrkúıekte balalardyń sanaly tárbıe jáne sapaly bilim alýyna tolyq jaǵdaı jasalýy kerek. Oǵan birinshi kezekte jergilikti atqarýshy organdar, ıaǵnı bilim basqarmalary jaýapty ekenin eske salamyn. Óńirler boıynsha Atyraý jáne Aqmola oblystarynyń áli de tolyq deńgeıde daıyn emes ekeni aıtyldy. Bul jerde másele qaýipsizdikke qatysty. Ásirese Atyraý oblysy birneshe ret ataldy», - dedi Ǵanı Beısembaev atalǵan vedomstvonyń apparat otyrysynda.

Sondaı-aq mınıstr Atyraý oblysy bilim basqarmasynyń basshysyna oqý jylyna daıyndyq boıynsha shuǵyl sharalar qabyldaý kerektigin júktedi.

«Aqmola oblysy boıynsha mektepterdegi kúrdeli jóndeý jumystarynyń 1 qyrkúıekke deıin bitpeýi múmkin. Sonymen qatar qaýipsizdik boıynsha ıaǵnı beınebaqylaý kamerlaryn jedel jeli ortalyǵyna tikeleı qosý boıynsha da máseleler bar. Pavlodar oblysy, sizderde de kúrdeli jóndeý boıynsha máseleler bar kórinedi. Eń bastysy balalardyń qaýipsizdigi, bilim basqarmalarynyń basshylary sol suraqqa sizder tikeleı jaýaptysyzdar», - deıdi ol.

Odan bólek, vedomstvo basshysy oqý jylyna daıyndyq barysy Úkimet otyrysynda qaralǵanyn jáne bilim bólimi basshylarynyń barlyq sharýa 1 qyrkúıekke deıin bitetini týraly ýáde berilgenin eske saldy.