Mınıstr Nurjigitov sý salasynyń ardager sarapshysymen keńesetinin aıtty

Syrdarııa arqyly Qazaqstanǵa kiretin sýdyń azaıyp bara jatqany tabıǵı ózgeristerge ǵana baılanysty. Sý resýrstary jáne ırrıgatsııa mınıstri Nurjan Nurjigitov BAQ ókilderimen ótken brıfıngide osyndaı paıym aıtty, dep habarlaıdy Kazinform.

«KSRO kezinde Sý resýrstary mınıstri bolǵan Narıman Qypshaqpaevtyń aıtýynsha, 1991 jylǵa deıin Syrdarııa arqyly keletin sýdyń úlesi 17 mlrd tekshe metrden astam bolǵan eken. Qazir 10-12 mlrd tekshe metr ǵana. 30 jyldyń ishinde 4 mlrd tekshe metr úlesimizdi joǵaltyp otyrmyz. Mınıstr retinde osy úlesti qaıtarýǵa kúsh salasyz ba?», – dep surady BAQ ókilderi.

Mınıstr bul máseleni sý salasynyń ardager sarapshysymen jeke talqylaǵanyn aıtady.

«Narıman Qypshaqpaıulymen jolyqqanmyn. Osy qyzmetke taǵaıyndala salyp, bardym. Ol kisi aýrýhanada jatyr eken. 1,5 saǵattan astam pikir bólistik. Osy Syrdarııa boıynsha da másele kóterildi. Óziniń oıyn, kózqarasyn aıtty. Endi sýdyń kólemi ár ózen boıynsha jyl saıyn ózgerip turady. Ol sýdyń qalyptasqan óz jaǵdaıyna baılanysty. Bir jyly sol Syrdarııadan 12-15 mlrd tekshe metr sý ótedi. Sý joq jyldary 56 mlrd tekshe metrge nemese 7-8 mlrd tekshe metrge túsip ketýi múmkin. Jalpy sý qaı jyly qalaı qalyptasady? Másele soǵan baılanysty bolyp tur.

Árıne, sýdy kóbirek alýǵa múddelimiz. Biraq oǵan óziniń bekitilgen kelisimi bar. Sol kelisimder boıynsha jumys isteımiz», – dedi Nurjan Nurjigitov.