Mınıstr Myrzaǵalıev ekologııalyq problemaǵa baılanysty Aqtóbege attandy

NUR-SULTAN. QazAqparat - Memleket basshysynyń tapsyrmasyna oraı Ekologııa, geologııa jáne tabıǵı resýrstar mınıstri Maǵzum Myrzaǵalıev Aqtóbege jumys saparyn jasaıdy, dep habarlaıdy QazAqparat tilshisi atalǵan vedomstvonyń baspasóz qyzmetine silteme jasap.

Maǵzum Myrzaǵalıev ózen arnasyn keńeıtý jumystaryn júrgizýdiń nátıjesinde týyndaǵan problemany zerdeleý úshin Aqtóbege attanyp ketken.

Sál budan buryn Memleket basshysy Qasym Jomart Toqaev mınıstr Maǵzum Myrzaǵalıevke Aqtóbedegi ekologııalyq jaǵdaıdy shuǵyl túrde sheshýdi tapsyrǵan edi.

«Aqtóbede ózen arnasyn keńeıtý boıynsha gıdrologııalyq jumystardyń durys oılastyrylmaǵanynan ekologııalyq qaýipti jaǵdaı qalyptasyp otyr. Máseleni shuǵyl túrde sheshý kerek. Bul jańadan qurylǵan mınıstrliktiń basshysyna alǵashqy tapsyrma», - dep jazǵan edi Qazaqstan Prezıdenti twitter-degi paraqshasynda.