Mınıstr Muhamedıuly sporttaǵy 2016 jyldyń úzdikterin marapattady

ASTANA. QazAqparat - Búgin QR Mádenıet jáne sport mınıstri Arystanbek Muhamedıuly vedomstvonyń alqa májilisi barysynda sporttaǵy 2016 jyldyń úzdikterin marapattady, dep habarlaıdy QazAqparat tilshisi.

Marapattaý rásimi Astanadaǵy «Qazmedıa» ortalyǵynda ótti.

Shara barysynda ótken jyldyń nátıjesi boıynsha úzdik shyqqan sportshylar, jattyqtyrýshylar, dene shynyqtyrý jáne sport salasyndaǵy mamandar, dene shynyqtyrý-sporttyq uıymdar marapattaldy.

Atap aıtqanda, «Úzdik sporttyq óńir» nomınatsııasy Astana qalasynyń dene shynyqtyrý jáne sport basqarmasyna berildi.  

«Aýdandyq úzdik dene shynyqtyrý jáne sport bólimi» nomınatsııasy boıynsha Shyǵys Qazaqstan oblysy Abaı aýdanynyń mádenıet, tilderdi damytý, dene shynyqtyrý jáne sport bólimi jeńimpaz atandy.
 

«Jyldyń úzdik sport federatsııasy»  atalymynda jeńimpaz Qazaqstannyń boks federatsııasy boldy.

«Jyldyń úzdik aýyl jattyqtyrýshysy» ataǵyn Súlaımanov Álimjan Rahymjanuly jeńip aldy. Ol 2008 jyldan bastap múmkindigi shekteýli sportshylarmen qosymsha jumys jasaı bastaǵan. 2011 jyldan beri Almaty oblysynyń dene shynyqtyrý jáne sport basqarmasy «Dene múmkindigi shekteýli adamdarǵa arnalǵan sport klýby» MKQK-da jattyqtyrýshy-oqytýshy bolyp jumys isteýde.

«Dene shynyqtyrý jáne sport salasyndaǵy úzdik maman» nomınatsııasy boıynsha Maksımova Natalıa Gennadevna marapattaldy. Ol Sporttyq medıtsına jáne ońaltý ortalyǵynda massaj jasaýshy.

«Sporttyń aýyldyq jerdegi úzdik nusqaýshy-ádiskeri» atalymynda Muhambetalın Qazı Kajyǵalıuly úzdik atandy. Ol Aqtóbe oblysy Alǵa aýdanynyń Bilim bóliminiń ádisker-nusqaýshysy.