Mınıstr muǵalimderdiń jalaqysyn keshiktirgenderdi jaýapkershilikke tartýdy tapsyrdy
NUR-SULTAN. QazAqparat – QR Bilim jáne ǵylym mınıstri Ashat Aımaǵambetov muǵalimderdiń jalaqysyn keshiktirgenderdi tártiptik jaýapkershilikke tartýdy tapsyrdy. Bul týraly mınıstrliktiń apparattyq keńesinde aıtyldy, dep habarlaıdy QazAqparat.
Mınıstrdiń aıtýynsha, keı óńirlerde pedagogter óz jalaqylaryn tolyq ári ýaqytyly ala almaı otyr. Osyǵan oraı, vedomstva basshysynyń tapsyrmasyna sáıkes, apta sońyna deıin barlyq aımaqtarda qyzmettik tekseris júrgizilip, tıisti sharalar qoldanylady.
«Jalaqy tóleýde ne sebepti keshiktirýler tirkelip jatyr? Mınıstrliktiń komıtetteri ár óńirde tekseris júrgizýi tıis. Mán-jaıdy anyqtap, jaýaptylardy tártiptik jaýapkershilikke tartý kerek. Máseleni baqylaýda ustańyz», – dedi Ashat Aımaǵambetov vıtse-mınıstr Bıbigúl Asylovaǵa qarata aıtqan sózinde.
Aıta ketsek, jalaqyny esepteıtin onlaın-kalkýlıator iske qosylǵaly bir aı ishinde mektepke deıingi jáne orta bilim berý mekemeleriniń ókilderi shamamen 1 500 000 ret jalaqylaryn ózdiginen eseptep, tıisti qarajatyn anyqtaǵan.
