Mınıstr mıneraldy tyńaıtqyshtar az sebiletin óńirlerdi atady
«Aýyl sharýashylyǵy daqyldarynyń ónimdiligin joǵarlaýyna áser etetin faktorlardyń biri - mıneraldy tyńaıtqyshtardy ǵylymı usynystarǵa sáıkes engizý. Biraq, búginde 2,5 mln tonna qajettilik kezinde respýblıkada shamamen 500 myń tonna mıneraldyq tyńaıtqyshtar engiziledi. Tyńaıtqyshtardy engizý kólemin ulǵaıtý maqsatynda 2020 jyly 26,2 mlrd teńge somasynda sýbsıdııa qarastyrylǵan. Bul rette bıyl respýblıkalyq bıýdjetten bólingen 23,3 mlrd teńgege qosa 2,8 mlrd teńge qosymsha qarajat bólindi, bul shamamen 522 myń tonna mıneraldy tyńaıtqyshtardy satyp alýdy jeńildetýge múmkindik beredi. Osy kórsetkish ótken jylmen salystyrǵanda 120 myń tonnaǵa artyq», - dedi S. Omarov Úkimet otyrysynda.
Onyń sózine qaraǵanda, 26 mamyrdaǵy jaǵdaı boıynsha aýyl sharýashylyǵy taýaryn óndirýshilerge 395 myń tonna tyńaıtqysh (jospardyń 76%-y) jetkizildi, óńirlerdegi saqtaý qoımalarynda qosymsha shamamen 31,8 myń tonna tyńaıtqysh bar. Bul baǵyt boıynsha jumys jalǵasatyn bolady.
«Tyńaıtqyshtardy engizýdiń josparǵa saı serpini Qyzylorda oblysynda baıqalady, onda engiziletin mıneraldy tyńaıtqyshtardyń kólemi ǵylymı negizdelgen normanyń 93 paıyzyn qurady. Al Soltústik Qazaqstanda oblysynda bul kórsetkish
36 paıyzdy jáne Túrkistan oblysynda 27 paıyzdy qamtymaq. Basqa oblystarda tyńaıtqysh paıdalanýdyń tómen deńgeıi baıqalady, osyǵan baılanysty barlyq oblys ákimdikterine osy jaǵdaıǵa erekshe kóńil bólýdi jáne joǵary ónim alý úshin tyńaıtqyshtardy satyp alý kólemin arttyrýdy usynamyz. 2018 jyly tyńaıtqyshtarǵa sýbsıdııa alý úshin agrohımııalyq kartogrammalardyń bolýy týraly talap engizilgen bolatyn.Sharýalar tarapynan túsken kóptegen ótinishter esepke alynyp, bul talap 2021 jylǵa deıin keıinge qaldyryldy. Biz sharýalardyń daıyndalýy úshin jáne topyraqtyń naqty agrohımııalyq jaı-kúıin eskere otyryp tyńaıtqyshtar qajet bolǵan jerde ǵana engizilýi úshin ýaqyt (2 jyl) berdik», - dedi vedomstvo basshysy.
Onyń aıtýynsha, osy ýaqyt ishinde topyraqqa agrohımııalyq taldaý júrgizý boıynsha qyzmet kórsetetin, qazirgi zamanǵy joǵary tehnologııalyq jabdyqtary bar jańa akkredıttelgen zerthanalar ashyldy.
«Zertteý júrgizý úshin ýaqyt jetkilikti boldy, osyǵan baılanysty oblystar ákimdikteri aýyl sharýashylyǵy taýaryn óndirýshiler arasynda 2021 jyly jáne odan keıingi jyldary sýbsıdııa alý úshin topyraqty agrohımııalyq zerttep-qaraý qajettigi týraly tıisti túsindirý jumystaryn júrgizýi qajet», - dep túsindirdi mınıstr.
Budan bólek, jergilikti oblystar bıýdjetterinde pestıtsıdterdi sýbsıdııalaýǵa 2020 jylǵa 37 mlrd teńge kózdelgen, bul shamamen 16,6 mln lıtr pestıtsıdti sýbsıdııalaýǵa múmkindik beredi. Alǵashqy ret gerbıtsıdter ǵana emes, sonymen qatar fýngıtsıdter men ınsektıtsıdter de sýbsıdııalanatyn bolady. Jalpy, bul egistiktiń fıtosanıtarııalyq qaýipsizdigin qamtamasyz etýge múmkindik beredi.