«Mınıstr men depýtat syılyq úshin «shekisip» qala jazdady» - respýblıkalyq basylymdarǵa sholý
ASTANA. Maýsymnyń 24-i. QazAqparat - QazAqparat agenttigi respýblıkalyq basylymdarda maýsymnyń 24-i, beısenbi kúni shyqqan ózekti materıaldarǵa sholýdy usynady.
***
«Alash aınasy» gazetiniń jazýynsha, jazǵy kanıkýl jaqyndaǵan saıyn belsendiligi kúrt artyp ketetin depýtattar keshe de aıanyp qalmapty. Olar Parlament Májilisiniń qaraýyna usynylǵan otyzǵa jýyq qujatty bas-aıaǵy birneshe saǵattyń ishinde qarap, qııýyn kelistirip jiberipti. Bul jaıynda basylymnyń beısenbilik nómirinde jaryq kórgen «Mınıstr men depýtat syılyq úshin «shekisip» qala jazdady» degen maqaladan oqı alasyzdar. Taqyrypqa tuzdyq bolǵan másele Kedendik odaq aıasynda shet elden tek 50 kelige deıin júkti tegin ákelýge bolady degen talap tóńireginde órbigen.
«Bolashaqpen» oqyp kelgenderdiń bilimin paıdalanýdy úılestirý ortalyǵyn qurý kerek pe?». «Alash aınasy» gazetiniń «Oı-kókpar» aıdarynyń búgingi osy saýalyna jaýap bergen saıasattanýshy Muhıt Asanbaev «Úılestirý ortalyǵyn qurý týraly aıtpas buryn osy «Bolashaq» baǵdarlamasynyń ózi qanshalyqty kerek bizge, mine, sol jaǵyn oılanyp kóreıikshi. Meniń oıymsha, sonyń qajeti joq. Ras, áý basta úkili úmit arttyq. Eldegi kadrdyń qadirin arttyrady dep oıladyq. Alaıda biz kútkendeı nátıje bermedi», depti. Al QR Prezıdenti janyndaǵy Memlekettik basqarý akademııasynyń ortalyq jetekshisi Álııa Muhamedjanova «Bolashaqpen» bilim alyp kelgenderge jaǵdaı jasaý máselesin tótesinen qoıatyn kez áldeqashan jetken. Óıtkeni Úkimet qorjynynan qyrýar qarjy bólingen eken. Endi sony tıimdi jumsalyp, dúrys ıgerilgeni durys emes pe?», degen oıyn alǵa tartady.
Úkimet úıinde Qazaqstan Respýblıkasynyń Premer-Mınıstri Kárim Másimov QR Úkimeti janyndaǵy kásipkerlik máseleleri jónindegi biryńǵaı úılestirý keńesiniń otyrysyn ótkizdi. Bul aqparatty «Alash aınasy» gazeti QR Úkimet basshysynyń baspasóz qyzmetine silteme jasap habarlap otyr. «Ekonomıkalyq damý jáne saýda mınıstri Janar Aıtjanovanyń aqparaty boıynsha, búgingi tańda ekinshi deńgeıli bankter jalpy somasy 194 mlrd. teńge kóleminde nesıe alý úshin kásipkerlerden kelip túsken 452 ótinimdi qarastyryp jatyr, sonyń ishinde jańa bıznes bastamalardy qoldaý úshin (22,6 mlrd. teńge kóleminde 37 ótinim), kásipkerlerdiń saýyqtyrý sektory úshin (151,2 mlrd. teńge kóleminde 402 ótinim), eksportqa shyǵarylatyn ónimdi qoldaý úshin berilgen ótinimder (20,3 mlrd. teńge kóleminde 13 ótinim) bar», dep jazady basylym.
***
Astana qalalyq máslıhatynyń qurylys, ekologııa, kólik, saýda jáne turǵyn úı sharýashylyǵy jónindegi turaqty komıssııasy bar. «Astana aqshamy» gazetiniń búgingi nómirinde osy komıssııanyń tóraǵasy Jańbyrshy Núrkenovpen aradaǵy suhbat «Mamandandyrylǵan mekeme kerek» degen taqyryppen berilgen. Subat barysynda qala ishinde qatynaıtyn qoǵamdyq kólikterdiń sany da, sapasy da jaqsaryp qalǵandyǵyn atap ótken máslıhat depýtaty «esesine, elordadaǵy taksılerdiń jumysy jolǵa qoıylmaı otyr. Osy kúni qalada memlekettik taksomotorlyq mekeme joq. Sonyń saldarynan ekiniń biri - taksıst. Jeke menshik tasymaldaýshylar sapa túgili qaýipsizdik erejelerine jaýap bermeıdi. Olardyń jumysyn qolǵa almasa bolmaıdy», depti.
Sondaı-aq osy basylymnyń «Áleýmet saýaly - ákim jaýaby» aıdarynda qala basshysy Imanǵalı Tasmaǵambetov elordalyqtardyń tolǵandyrǵan saýaldaryna tuşymdy jaýap bergen.
***
«Iordanııa astanasy Amman shaharynyń ortalyq kósheleriniń birine Qazaq Prezıdenti Nursultan Nazarbaevtyń esimi berildi. Dańǵyldyń ashylý saltanatyna Qazaqstannan bir top memleket jáne qoǵam qaıratkerleri bardy», dep jazady «Aıqyn» gazeti «Arab dúnıesi Nazarbaevty «Jaryq sultany», «Adamdarǵa nur syılaýshy sultan» retinde erekshe qadirleıdi» atty maqalasynda. Basylymnyń atap ótýinshe, Ammandaǵy dańǵylǵa N.Nazarbaevtyń esimin berý bastamasyn Korol ákimshiligi kótergen.
Keshe tyǵyz jumys kestesinen ýaqyt tapqan el Prezıdenti elorda tórindegi «Shabyt» shyǵarmashalyq saraıynda boldy. Atalǵan bilim ordasynyń basshysy Aıman Musaqojaeva Elbasyna bilim oshaǵynyń jańa mamandar daıyndaıtyn dárishanalaryn, shaǵyn kınolar túsirýge jáne taza dybys jazýǵa arnalǵan rejısserlik stýdııalaryn, kórkem jáne horeografııalyq zaldaryn, balet synybyn aralatyp, tanystyrǵan. Maqalanyń egjeı-tegjeıin «Aıqyn» basylymnyń beısenbilik sanyndaǵy «Elbasy «Shabytqa» kirdi» degen taqyryptan oqı alasyzdar.
***
«Nur Astana» gazetiniń jazýynsha, bıylǵy «Bolashaq» baǵdarlamasymen shetelde bilim alýǵa nıet bildirgen aýyl jastaryna, memlekettik qyzmetshilerge, ǵylymı jáne pedagog qyzmetkerlerge jáne ǵylymı taǵylymdamadan ótý úshin ǵylymı qyzmetkerlerge kvota qarastyrylǵan. Halyqaralyq stıpendııa aıasynda belgilengen kvotaǵa ilikkender úshin shet tilin bilýdiń eń tómengi deńgeıi jalpy konkýrs negizinde tapsyrǵan talapkerlerge qaraǵanda tómendetilgen. Sonymen qatar, úmitkerlerdiń osy sanattary úshin keminde 4 oqý semestrinde tildik kýrstardan ótý múmkindigi, ǵylymı taǵylymdamadan ótýge úmitkerlerge uzaqtyǵy keminde 1 oqý semestr bolatyn tildik kýrstar kózdelgen.
***
«Kazahstanskaıa pravda» gazetiniń jazýynsha, keshe Qazaqstan Respýblıkasynyń Premer-Mınıstri Kárim Másimov Astanadaǵy Jańa ýnıversıtettiń oqý, ǵylymı jáne ákimshilik keshenderiniń, «Han Shatyr» saýda-oıyn saýyq ortalyǵynyń, sondaı-aq «Haziret Sultan» jańa meshitiniń qurylys jumystarymen tanysqan. Basylym bul aqparatty QR Úkimetiniń baspasóz qyzmetine silteme jasap habarlap otyr.
