Mınıstr: memorgandar zań jobasyn oryssha daıyndap, Google-men aýdara salady

Ádilet mınıstri Azamat Esqaraev vedomstvoda zań normalaryn memlekettik tilde jazý qolǵa alynǵanyn aıtty, dep habarlaıdy QazAqparat tilshisi.

«Rasynda da memlekettik organdar zań jobalaryn eń aldymen, oryssha daıyndap, odan keıin Google Translate qosymshasy arqyly memlekettik tilge aýdara salady. Árıne, memlekettik tildegi ondaı mátinde qandaı sapa bolmaq? Bul múldem kelisýge bolmaıtyn jaıt. Bul ózi biraz jyl boıy kóterilip kele jatqan ózekti másele bolyp tur. Sondyqtan osy máseleni alqa májilisinde arnaıy kóterdim. Qazirgi ýaqytta zań jobalaýǵa bastamashylyq jasaıtyn memlekettik organdarǵa zań normalaryn eń aldymen, qazaq tilinde jazyp, odan keıin qajet bolsa basqa tilge aýdarýdy usynyp jatyrmyz», – Azamat Esqaraev.

Degenmen, mınıstr basqa memlekettik organdarǵa zań normalaryn qazaq tilinde jazýdy talap ete almaıtyndyqtaryn, tek usynys beretindikterin atap ótti.

«Al Ádilet mınıstrliginde qolǵa aldyq. Mysaly, ózimizdiń vedomstvolyq topta Qylmystyq kodekske, Qylmystyq-protsessýaldyq kodekske ózgertýler engizýdi memlekettik tilde ázirleýdi qolǵa alyp otyrmyz», – dedi ol.

Aıta keteıik, elordada zańnama jáne quqyqtyq aqparat ınstıtýtynyń 30 jyldyǵyna arnalǵan halyqaralyq ǵylymı-tájirıbelik konferentsııa ótip jatyr.