Mınıstr memlekettik satyp alýda «kásibı shaǵymdanýshylar» týraly aıtty
ASTANA. QazAqparat -Parlament Májilisiniń jalpy otyrysynda QR Qarjy mınıstri Álıhan Smaıylov memlekettik satyp alý salasynda jónsiz shaǵymdanýdy kásip etkendermen kúres sharalary týraly aıtyp berdi, dep habarlaıdy QazAqparat.
«Búginde memlekettik satyp alýda «kásibı shaǵymdanýshylar» paıda boldy. Olardyń basty maqsaty - qatysý emes, satyp alý rásimderin buzýdan zańsyz paıda kórý», - dedi Á. Smaıylov.
Onyń sózine qaraǵanda, osyndaı jaǵdaılardy boldyrmaý úshin tıisti usynystar jasalyp otyr.
«Birinshiden, konkýrstyq ótinishti qamtamasyz etýdi engizbegen ónim berýshilerge basqa qatysýshylardyń qujattaryn qaraýǵa tyıym salynady. Sonymen qatar, konkýrstyq qujattamany aldyn ala talqylaýǵa qatyspaǵan ónim berýshilerdiń shaǵymyn qaramaý eskerilgen. Satyp alýǵa qatyspaǵan úshinshi tulǵalardyń shaǵymdary boıynsha shart jasasý merzimin toqtatpaý usynylady», - dedi Qarjy mınıstri.
Budan buryn habarlanǵandaı, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik satyp alý jáne kvazımemlekettik sektor sýbektileriniń satyp alý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
QR Qarjy mınıstri memlekettik satyp alýlar salasyndaǵy problemalardy ataǵan bolatyn.
Sonymen qatar Álıhan Smaıylov qurylys salasynda memlekettik satyp alýdy jetildirý tártibin túsindirdi.
Zań jobasy aıasynda sottalǵandardy memtapsyrysty oryndaýǵa jumyldyrý sharalary eskerilgen.
