Mınıstr mektepterdi lıtsenzııalanǵan kúzetpen qamtý máselesinde áli de kemshilik bar ekenin aıtty

Oqý-aǵartý mınıstrliginde ótken apparat jınalysynda balalardyń qaýipsizdigin qamtamasyz etý máseleleri talqylandy, dep habarlaıdy Kazinform agenttigi. 

«Monıtorınginiń nátıjesi kórsetip otyrǵandaı, bilim berý uıymdarynda tehnıkalyq jaraqtandyrý jáne lıtsenzııalanǵan kúzet máseleleri boıynsha jergilikti atqarýshy organdardyń jumysynda áli de aıtarlyqtaı kemshilikter bar ekenin baıqap otyrmyz. Bilim berý uıymdarynda qaýipsizdikti qamtamasyz etý qolǵa alynbaǵan jaǵdaıda tıisti sharalar qabyldanady. Almaty qalasynda zaqym alǵan balaǵa der kezinde tıisti kómek kórsetilmegeni týraly estip otyrsyzdar. Sondyqtan balaǵa qaýip tóngende nemese jaraqat alǵanda tıisti áreketterdi jasaýdy esten shyǵarmaý kerek. Bala jaraqat alǵan jaǵdaıda muǵalimder jedel járdem shaqyrýdyń ornyna búldirshindi ekinshi balamen qosyp, úıine qaıtara salý – bul eshqandaı jol berilmeıtin jaǵdaı», - dedi mınıstr.

Ǵanı Beısembaev bilim basqarmalary qaýipsizdik máselesin jiti baqylaýda ustaý qajettigin eskertti.

«Qazir keıbir bilim mekemeleriniń basshylary sol oryndaǵy balalardyń qaýipsizdigi tikeleı bastyqtyń mindeti ekenin áli de túsinbeıtin, bilmeıtin sııaqty kórinedi. Sondyqtan barlyq bilim ordalarynyń basshylary mektepte qaýipsiz orta qurýmen qatar sapaly bilim berýdi qamtamasyz etý ekenin taǵy da eske salamyn», - dep málim etti vedomstvo basshysy.

Toqtala keteıik, Almaty mektepteriniń birinde oqýshy qadaǵa qulap, qýyq pen toq ishegin tesip ketken. Bul jaǵdaıdy bilgen muǵalim jedel járdem shaqyrmaı, balany úıine jibergen.