Mınıstr mektep kitaphanalarynda qordalanǵan problemalardy atady
«Kitaphanalardyń jumys isteý tártibin qazir biz ózgertip, avtomattandyryp, tsıfrlandyrýymyz kerek. Máselen 78 óńirde birde-bir kompıýter joq. HHІ ǵasyrdaǵy ol ne degen kitaphana? Oqý zaldary balalarǵa yńǵaıly bolýy tıis. Mysaly, jańadan ashylyp jatqan mektepterdi, halyqaralyq nemese jekemenshik mektepterge baryp qarasaq, kitaphanalary múlde bólek kontseptsııada. Qońyraý soǵylǵan ýaqytta balalar sonda baryp, kitaptardy alyp, oqýǵa bolarlyq, qyzyǵýshylyq týdyraıtyndaı jasaqtalǵan. Al bizdiń balalar kitaphanalarǵa baryp jatyr ma? Kitaphanalardyń jaǵdaıy qandaı? Kóbinde tipti jıhazy, kompıýteri de joq. Ony qoıyp, tıisti kabınetteri de joq. Olarda kórkem ádebıet te joqtyń qasy. Sondyqtan osylardyń bárin qamtıtyn, úlken ári ortaq jol kartasyn daıyndap, qordalanǵan máseleniń bárin tez arada sheshýimiz kerek», - dedi Ashat Aımaǵambetov.
Mınıstrdiń aıtýynsha, jalpy kitaphanalar júıesin «Oqýlyq» ortalyǵy úılestiredi. Al negizinen uıymdastyrýshy bolyp otyrǵan Respýblıkalyq ǵylymı-pedagogıkalyq kitaphana 7 myń mektep pen 900-ge jýyq kolledjdiń kitaphanalaryn, qajet jaǵdaıda JOO kitaphanalarynda da uıymdastyrý jumystaryn júrgizedi.
«Bizde Ádebıet jáne óner ınstıtýty men Ahmet Baıtursynuly atyndaǵy Til bilimi ınstıtýty bar. Osy ınstıtýttar ǵylymı-zertteý jumystaryn júrgizip, jas ereksheligine qaraı ár synyp boıynsha usynys engizýi kerek. Sodan keıin biz Mádenıet jáne sport mınıstrligimen aqyldasa otyryp, tizim bekitýimiz (kitaptardyń tizimin) kerek. Osy balalardyń jas ereksheligine baılanysty qandaı ádebıetti oqýy kerek degen usynystar bolýy tıis. Osy usynystardy ınstıtýttardan kútemin. Árıne bizdiń Ulttyq bilim akademııasy da osy jumysqa atsalysady», - dedi ol.
Mınıstr jyl saıyn mektepter kórkem ádebı kitaptardy alyp otyrýy kerektigin jetkizdi.
«Biz tizimdi bekitkennen keıin mektepterge sol kitaptardy alýǵa mindetteımiz. Bıyl bul kitaptardy satyp alý jumystary bastaldy. Biraq bul jetkiliksiz», - dedi Ashat Aımaǵambetov.
