Mınıstr mektep bitirý keshteri týraly: qoǵam shekten tys dańǵazaǵa jol bermeýdi surap otyr
ASTANA. KAZINFORM – Mektep bitirý keshteriniń daraqylyqqa aınalýy máselesine qatysty Oqý-aǵartý mınıstrligi shekteý sharalaryn engizdi. Bul týraly Úkimette ótken brıfıngte Oqý-aǵartý mınıstri Juldyz Súleımenova málim etti.
Mınıstrdiń aıtýynsha, osy jyldyń mamyr aıynda vedomstvo jergilikti atqarýshy organdarmen birlesip arnaıy buıryq qabyldaǵan.
– Atalǵan buıryqta bitirý keshterin mektepten tys, meıramhanalarda jáne basqa da oryndarda ótkizýge tyıym salyndy. Sonymen qatar ata-analardan qarajat jınaýǵa da tyıym engizildi, – dedi ol.
Spıker áleýmettik jelilerde taraǵan beınejazbalarǵa da toqtaldy.
– Almaty qalasyndaǵy beınejazbalardy kórip otyrsyzdar. Jalpy ákimdikter men jergilikti ishki ister organdary osy buıryqtyń oryndalýyn qatań baqylaýǵa alady. Zań bárimizge ortaq. Bul buıryq zań jáne qaǵıdattar aıasynda qabyldandy. Qoǵam tarapynan da osyndaı artyq dańǵazaǵa jol bermeý týraly suranys bar, – dedi mınıstr.
Onyń sózinshe, buıryqtyń oryndalýyn qamtamasyz etý úshin tıisti sharalar qabyldanyp jatyr.
Sonymen qatar brıfıngte ustazdardyń mártebesin kóterý máselesi de qozǵaldy. Mınıstr Qarasaı aýdanynda muǵalimge qatysty bolǵan oqıǵaǵa pikir bildirdi.
– Ustazdardyń mártebesi zańmen belgilengen. Atalǵan rezonansty oqıǵa boıynsha qylmystyq is qozǵaldy. Qazir jan-jaqty tekserý júrgizilip jaty. Zańǵa sáıkes kináli tulǵalar jaýapqa tartylady, – dep atap ótti Juldyz Súleımenova.
Aıta keteıik, Meıramhanalarda mektep bitirý keshterin uıymdastyrýǵa tyıym salyndy.
