Mınıstr medıtsınalyq saqtandyrýdyń jańa modeliniń jetistikterin talqylady

ALMATY. QazAqparat – Qazaqstanda 2020 jyldan bastap bir adamdy medıtsınalyq qamsyzdandyrýǵa jylyna 92,2 myń teńge bólinetin bolady. Bul 2020 jyldyń 1 qańtarynan bastap engiziletin jańa MÁMS jáne tegin medıtsınalyq kepildendirilgen kómek kólemi modeliniń arqasynda múmkin bolmaq. Buǵan tek mindetti medıtsınalyq saqtandyrý júıesine qatysatyn adamdar ǵana qol jetkize alady, dep habarlaıdy QazAqparat tilshisi.

Bul týraly Almatyda ótken saqtandyrý medıtsınasyna alynǵan baǵyt týraly ótken konferentsııa barysynda QR DSM basshysy Eljan Birtanov aıtty.

«Jańa júıege daıyndyq óte joǵary. Birinshiden, búkil normatıvtik standarttar, zańdar, buıryqtar qabyldandy. Eń mańyzdysy ınfraqurylym jaǵynan bári qamtylǵan. MÁMS 2 jyl istep keledi. 2 jyl ishinde Medıtsınalyq saqtandyrý qory medıtsınalyq mekemelermen kelisim shartqa otyryp aı saıyn tólem jasalyp jatyr. Aqparattyq júıeler, tsıfrlandyrý máselesi sheshilýde. Tehnıkalyq jaǵynan daıyndyq óte joǵary bolmaq.

Halyqty, saqtandyrý kompanııalarynyń ókilderin, medıtsınalyq qyzmetkerlerdi túsindirý, oqytý jumystaryn bastap jatyrmyz. Ofıs qurylyp jatyr. Densaýlyq saqtaý basqarmalarynyń basshylary ózderi kelip tanysyp jatyr. Daıyndyq 100 paıyz dep aıtýǵa bolmaıdy. Bul kezeń-kezeńimen júzege asatyn dúnıe. Bizdiń oıymyzsha 95 paıyz halqymyzdyń daıyndyǵy bar», - dedi mınsıtr Eljan Birtanov.

DSM basshysynyń aıtýynsha, keler jyldan bastap densaýlyq saqtaý salasyndaǵy eń mańyzdy másele eń negizgi medıtsınalyq qyzmetterge qol jetimdilik, dári dármekterge qoljetimdilik máselesi sheshiletin bolady.

«Qazir jylda adam basyna medıtsınalyq qarjy kólemine qosymsha 60 paıyzdan astam qarjy qosylady. Jańa júıe qosymsha dári dármek, dıagnostıka, ońaltý sharalarynan ótýge múmkindik beredi. Medıtsınalyq qyzmetkerlerdiń aılyǵyn kóterýge múmkindik týady. Burynǵydaı bir adamǵa 52,5 myń teńge emes, jylyna 92,2 myń teńge bólinetin bolady. Memleket basshysy úkimetke tapsyrma berdi. Máseleni qosymsha zerttep, aqyldasyp, 1 qazanǵa deıin oı bólisetin bolamyz. Keler jyldyń 1 qańtarynan bastaý qajet», - dedi mınıstr.

Jańadan engiziletin tegin medıtsınalyq kómektiń kepildendirilgen kólemi men MÁMS jańa júıesiniń arqasynda adamdar eki paket arqyly medıtsınalyq kómek alatyn bolady.

Bul júıe qyrkúıekten bastap Qaraǵandy oblysynda testilik rejimde engiziledi.