Mınıstr medıtsınalyq qaýymdastyqtyń MÁMS týraly pikirin tyńdady

ALMATY. QazAqparat - QR Densaýlyq saqtaý mınıstri Eljan Birtanov medıtsınalyq qaýymdastyqpen kezdesip, mindetti áleýmettik medıtsınalyq saqtandyrý túıtkildi máselelerin talqylady, dep habarlaıdy QazAqparat tilshisi.

S.Asfendııarov atyndaǵy Qazaq Ulttyq medıtsınalyq ýnıversıtetiniń ujymy mınıstrge óz kózqarastaryn jetkizdi.

«Áleýmettik medıtsınalyq saqtandyrý» qorynyń basqarma tóraıymy Elena Bahmýtovanyń aıtýynsha, aýdarymdar týraly aqparat apta saıyn jańaryp turady.

15 qyrkúıektegi jaǵdaı boıynsha, qazir qorda 8 mlrd teńge jınalǵan.

Áleýmettik tólem aýdarylyp jatqan salymshylardyń sany 3,9 mln adamǵa jetti.

Onyń aıtýynsha, jyl sońyna deıin qarjy kólemin 25 mlrd teńgege jetkizý oıda bar.

Búginde naryq qatysýshylarynyń bazasyna 1519 uıym kirip úlgergen. Olardyń 686-i jekemenshik uıymdar.

Bahmýtovanyń aıtýynsha, qor qarjysynyń saqtalýyn memleket qamtamasyz etedi. Al qarjy QR Ulttyq bankinde jatyr.

Qalalyq Densaýlyq saqtaý basqarmasynyń basshysy Ýálıhan Ahmetov em sharasynyń naqty quny men kórsetilgen tarıfter sáıkespeıtindigin tilge tıek etti.

«Kepildendirilgen medıtsınalyq kómekti naqtylaý kerek. Belgili bir patsıentke qajetti qyzmetti ǵana oqshaýlaý kerek. Saqtandyrý kómegi boıynsha dıspanserlik emdeýde biz shyǵyndy óteı alatynymyzǵa senimdi bolýymyz kerek. Qyzmet jetkizýshi shyǵynǵa batpaıtynyna senimdi bolǵany jón. Sol kezde ol qyzmet kórsetýge múddeli bolady»,- dedi Ýálıhan Ahmetov.

Tis dárigerleri lıtsenzııalaý jumystarynyń qıyndyǵyn, jańa tsıfrlyq tehnologııalardy engizýdiń mashaqaty kóp ekendigin alǵa tartty.

Stomatologııa salasynda emdeýge memlekettik tapsyrys kólemi tym tómen jazylǵan.

Al qural-jabdyq satatyn fırmalar baǵany tym joǵary qoıady.

Mınıstrlik baqylaý fýnktsııalarynyń birazyn jekemenshikke ótkizýdi josparlap otyr.

QR DSM jobalardy basqarý departamentiniń dırektory Tımýr Sultanǵazıevtiń aıtýynsha, bıznesti tartý jolynda tarıf qalyptastyrý ádisi qaıta qaralady.

Jaqynda memleket basshysy MÁMS engizýde asyǵystyq jasaýmdy tapsyrǵan bolatyn.

Jaqyn arada mınıstrlik Memleket basshysyna sheshilmegen suraqtar boıynsha usynystar kórsetý kerek.

«Bul sońǵy talqylaý emes. Barlyqtaryńyzdy pikirtalasqa qatysýǵa shaqyramyn. Árıne, Memleket basshysynan memlekettik organ retinde MÁMS júıesiniń engizilýin suraıtyn bolamyz. Keı jerlerde sheshilmegen máseleler bar. Qalaı bolǵanda da qor jalǵyz tóleýshi retinde jumys jasaıdy. Qyzmet kórsetýshiler arasynda teń básekelestik jaǵdaıy qalyptasady. Basty qaǵıda patsıentterdiń tańdaýyna negizdeledi», - dedi Eljan Birtanov.

Aıta ketý kerek, 1 shildeden bastap jumys berýshiler jumysshylaryna MÁMS tólemderin tóleı bastady.

Júıe tolyǵymen 2018 jyldyń 1 qańtarynan bastap iske qosylady.