Mınıstr medıtsına qyzmetkerlerin saqtandyrý tetigine túsinik berdi
Elimizde dárigerdiń kásibı jaýapkershiligine qatysty mindetti saqtandyrý júıesi engizilmek.
A. Ǵınııattyń aıtýynsha, mınıstrlik medıtsına qyzmetkerleriniń kásibı jaýapkershiligin saqtandyrýdyń túrli modelderine taldaý júrgizdi.
«Halyqaralyq tájirıbede medıtsına qyzmetkerlerin qorǵaý úshin tıisti qorlar men qaýymdastyqtar (Shvetsııa, Kanada, Danııa) qurý, sondaı-aq jeke naryqtar (AQSh, Germanııa, Japonııa, Túrkııa) arqyly kásiptik jaýapkershilikti mindetti saqtandyrý júıesi qoldanylady. Halyqaralyq tájirıbege súıene otyryp, medıtsına qyzmetkerleriniń kásiptik jaýapkershiligin saqtandyrýdyń ońtaıly tetigi retinde Shvetsııa, Kanada, AQSh, Japonııa jáne Túrkııa modelderi boıynsha beıimdelgen naryqtyq saqtandyrý modelin qoldanýdy usynyp otyrmyz», - dedi A. Ǵınııat Májiliste jańadan saılanǵan depýtattar aldynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde.
Sonymen qatar, ol 2017 jyly mınıstrlik Memleket basshysynyń tapsyrmasy boıynsha Derbes kepildik berý qoryn qurý aıasynda yntymaqtastyq qaǵıdaty boıynsha saqtandyrýdyń áleýmettik modelin usynǵanyn eske saldy (jarna mólsherin medıtsınalyq uıymǵa – 50%, medıtsına qyzmetkerine – 50% dep bólý). Alaıda, zań jobasy qoldaý tappaı, qabyldanbady.
«Halyqaralyq tájirıbeni taldaýdyń negizinde, sondaı-aq jurtshylyqtyń, memlekettik organdardyń jáne saqtandyrý kompanııalarynyń qatysýymen tıisti talqylaýlar boldy. Bul turǵyda jumys istep turǵan saqtandyrý kompanııalary arqyly medıtsına qyzmetkerleri kásiptik jaýapkershiliginiń júktelgen saqtandyrý modeli qabyldandy. Jumys berýshi – medıtsınalyq uıym saqtanýshy bolady. Bolashaqta medıtsına qyzmetkerlerin lıtsenzııalaýdy engizgennen keıin, medıtsına qyzmetkerleriniń kásiptik jaýapkershiligin saqtandyrý júıesine qatysýshylardyń jaýapkershiligin bólýge múmkindik beredi», - dedi mınıstr.
A. Ǵınııattyń sózine qaraǵanda, osy modelge sáıkes shaǵymdy qaraǵan kezde medıtsınalyq uıym medıatsııa elementterin qoldanyp, sondaı-aq medıtsınalyq qaýymdastyqtardy tarta otyryp, ishki aýdıt qyzmetiniń deńgeıinde júzege asyrady. Bul kezeńde másele medıtsınalyq uıymnyń ózinde rettelýi múmkin. Tıisti komıssııa naýqastyń densaýlyǵyna zııan keltirildi degen sheshim jasasa, osy oraıda patsıentke tólem jasaý úshin saqtandyrý kompanııasyna joldama beriledi.
«Eger patsıent komıssııanyń sheshimimen kelispegen jaǵdaıda, shaǵym saraptamalyq qorytyndy berý úshin Medıtsınalyq jáne farmatsevtıkalyq baqylaý komıtetine tapsyrylady. Oń nátıje shyǵarylǵan jaǵdaıda, shaǵym boıynsha materıaldar, onyń ishinde sot-medıtsınalyq saraptamanyń qorytyndysy medıtsınalyq uıym saqtandyrylǵan saqtandyrý kompanııasyna beriledi. Ol jerde patsıentke keltirilgen zııan úshin ótemaqy tóleýdi Densaýlyq saqtaý mınıstrligi aıqyndaǵan qaǵıdalar boıynsha saqtandyrý kompanııasy júrgizedi. Tólemnen bas tartqan jáne sheshimge qanaǵattanbaǵan jaǵdaıda, patsıent sotqa júginýge quqyly», - dedi A. Ǵınııat.
Zań qabyldanǵannan bastap saqtandyrýdy jumys berýshiniń esebinen júzege asyrý usynylyp otyr.
«Al, 2025 jyldan bastap saqtandyrý syılyqaqysynyń somasyn medıtsınalyq uıym men medıtsına qyzmetkerleriniń arasynda bólý usynyldy. Bul óz kezeginde ortaq kásiptik jaýapkershilikke ákeledi», - dedi mınıstr.
Onyń atap ótýinshe, kásiptik jaýapkershilikti saqtandyrý júıesimen 304 myńnan astam medıtsına qyzmetkerin qamtý usynyldy.
Budan buryn habarlanǵandaı, Ajar Ǵınııat medıtsına qyzmetkerlerine qatysty qozǵalǵan qylmystyq ister týraly aıtty.
