Mınıstr Maıqaıyń týraly: Máıitterdi tabamyz dep tiri qutqarýshylardan aıyrylyp qalmaıyq

ASTANA. KAZINFORM — Tótenshe jaǵdaılar mınıstri Shyńǵys Árinov Maıqaıyń kenishinde avtobýspen oıyqqa qulap ketken qutqarýshylardy izdeý boıynsha pikir bildirdi.

«Maıqaıyńaltyn» aktsıonerlik qoǵamynda qazirgi tańda qutqarýshylarǵa qaýip bolǵandyqtan, olardyń jumysy toqtatylǵanyn bilesizder. 13 mamyrdan bastap daıyndyq sharalary júrip jatyr, onyń ishinde taý-ken jumystary, qulaǵan topyraqtyń soltústik-shyǵys bóligin keńeıtý jumystary áli jalǵasýda. Bul jumys bitip, qutqarýshylarǵa qolaıly jaǵdaı týǵan soń izdeý jumystary jalǵasady. Naqty ýaqytyn aıta almaımyn», — dedi mınıstr Úkimet úıinde ótken brıfıngte.

«Mınıstr retinde mindetti túrde izdeý jumystaryn jandandyramyz, iz-tússiz ketkenderdi tabamyz dep ýáde bere alasyz ba?» dep suraq qoıdy tilshiler.

«Bul — máıitterdi shyǵaramyz dep tiri qutqarýshylardan aıyrylyp qalmaıyq degen oı, sondaı maqsatpen búkil qaýipsizdik sharalaryn qabyldap jatyrmyz. Sondyqtan túsinýlerińizdi suraımyz», — dedi Shyńǵys Árinov.

Eske sala keteıik, bıyl 4 qańtarda «Maıqaıyńaltyn» ken ornynda úlken oıyq mańynda topyraq opyrylyp, 4 adam mingen avtobýs jerdiń astyna túsip ketken bolatyn.

15 mamyrda Maıqaıyń altyn kenishinde qos qutqarýshyny izdeý jumystary qaıta jandandy.

Elorda soty altyn kenishindegi qaıǵyly oqıǵa 100% «Maıqaıyńaltyn» AQ-nyń kinásinen bolǵan degen mámile jasaǵan edi.

Eńbek jáne áleýmettik qorǵaý komıtetiniń tóraǵasy Tólegen Ospanqulov Maıqaıyńdaǵy apat boıynsha 21 adam kináli dep tanylýy múmkin ekenin málim etti.