Mınıstr masa shaǵyp kóz jumǵan áıelge aldyn ala qoıylǵan dıagnozdy aıtty
«Birinshi qalalyq aýrýhanada kóz jumǵan áıelge qatysty aıtarym - bul jaǵdaı meniń baqylaýymda. Qazirgi tańda naqty bir mınýttyń, tipti bir sekýndtyń ishinde ne bolǵanyna deıingi aqparat qolymyzda bar. Búgingi kúni «anafılaktıkalyq shok» degen aldyn ala dıagnoz qoıylyp otyr. Bizdiń boljaýymyzsha, jalpy allergııalyq reaktsııanyń aıasynda barlyq dári-dármekter tolyǵymen hattamalyq dıagnostıka men emdeý, standart boıynsha qoldanylǵan, alaıda osy kezde kúrdelelik paıda bolǵan», - dedi mınıstr Úkimet otyrysynan keıin tilshilerdiń suraǵyna jaýap bere otyryp.
Ol óz sózinde istiń barlyq mán-jaıyn zertteý quqyq qorǵaý organdary qyzmetkerlerimen júrgiziletinin atap ótti.
«Quqyq qorǵaý organdaryna habar berildi. Olar barlyq dári-dármekterdi tárkiledi, sondyqtan bul biraz ýaqytty alady. Sebebi, toksıkologııalyq saraptama júrgiziledi. Onyń qorytyndysy boıynsha ne bolǵanyn biz mindetti túrde habarlaıtyn bolamyz», - dedi vedomstvo basshysy.
Óz kezeginde qalalyq qoǵamdyq densaýlyq saqtaý basqarmasynyń basshysy Kamaljan Nadyrov qaıtys bolǵan áıelge preparat qalaı berilgenin aıtyp berdi.
«Bul bizdiń kúndelikti ondaǵan, júzdegen patsıentterge berilip jatqan preparattar. Biraq, tek saraptama qorytyndysy ǵana ólim jaǵdaıyna ne sebep bolǵanyn anyqtap beredi. Patsıent aýrý men qyshýdy sezinetinin aıtyp shaǵymdanǵan. Osyǵan baılanysty oǵan ketonal berilgen», - deıdi Kamaljan Nadyrov.
Esterińizge sala keteıik, atalǵan áıeldiń aýrýhanada kóz jumǵany týraly onyń qurbysy Feısbýktegi paraqshasynda jazǵan bolatyn. Onyń atap ótýinshe, 28 jastaǵy Maqpal Espenbetova elordadaǵy birinshi qalalyq aýrýhananyń kómegine júgingen.