Mınıstr marıhýanany zańdastyrýdy usyndy
ASTANA. 7 maýsym. QazAqparat - Frantsııanyń Turǵyn úı qurylysy mınıstri, «Jasyldar» partııasynyń kóshbasshysy Sesıl Dıýflo marıhýanany alkogol ónimderi men temekige teńestirý jóninde usynys jasady, dep habarlaıdy Lenta.rý saıty.
Dıýflo bul málimdemesin Frantsııadaǵy parlamenttik saılaýǵa sanaýly kúnder qalǵanda (saılaý 10 maýsymda ótedi) jasap otyr. Saılaýǵa onyń da partııasy túsedi dep kútilýde. Mınıstrdiń oıynsha, marıhýanany zańdastyrý esirtki trafıgin azaıtyp, qylmystardyń aldyn alady. Sondaı-aq, memlekettiń densaýlyq saqtaý baǵdarlamasyn tıimdi júzege asyrýǵa septigin tıgizedi.
Dıýflo óz partııasynyń ustanymyn jaýapkershiligi mol ári zamanǵa saı ustanym dep esepteıdi.
Mınıstrdiń usynysy Frantsııa Úkimetin ekige jaryp, qyzý pikirtalas alańyna aınaldyrýy múmkin dep esepteıdi RTL agenttigi. Al Premer-mınıstr Jan-Mark Ero bul tek Dıýflonyń jeke ustanymy ekenin, oǵan úkimettiń esh qatysy joq ekenin málim etken. Іshki ister mınıstri Manýel Vals esirtkige qatysty qoldanystaǵy zańnyń bir mysqalǵa da jumsarýyna qarsy ekenin basa aıtqan. Sondaı-aq, burynǵy Ádilet mınıstri Rashıda Datı Dıýflonyń «jónsiz málimdemesi» aıda aspanǵa shyǵarǵanyn aıtýda.
Frantsýz saıasatkerleriniń arasynan marıhýanany zańdastyrý týraly málimdemeni bir ǵana Dıýflo jasap otyrǵan joq. 2011 jyly Frantsııanyń burynǵy Іshki ister mınıstri Danıel Vaıan da marıhýanany zańdastyrý kerek dep baıandama jasaǵan bolatyn. Qazirgi Frantsııa prezıdentiniń saılaý kezindegi keńesshisi bolǵan Fransýa Rebsaman da osyǵan uqsas málimdeme jasaǵan. Alaıda Fransýa Olland ony joqqa shyǵarǵan edi.
Eýropalyq esirtki monıtorıngisi ortalyǵynyń derekteri boıynsha, 2005 jyly eresek frantsýzdardyń 5 paıyzy marıhýanany qoldanatyndaryn ashyq aıtqan kórinedi.
