Mınıstr magıstratýra men doktorantýra jóninde: shákirtaqy taǵy da ósedi
ASTANA. KAZINFORM – Keıingi 7 jylda 655 myńnan astam grant berildi. Bul týraly Ǵylym jáne joǵary bilim mınıstri Saıasat Nurbek málim etti.
- Joǵary bilimge qoljetimdilik Qazaqstanda óte joǵary deńgeıde dep aıtýǵa bolady. Sońǵy 7 jyldyń ishinde memlekettik tapsyrys aıasynda 655 myńnan astam grant berildi. 1,5 trln teńgeden astam qarjy osy baǵytqa bólindi, - dedi S.Nurbek Ortalyq kommýnıkatsııalar qyzmetindegi baspasóz máslıhatynda.
Sonymen qatar ol keıingi bes jylda shákirtaqy keminde eki ese, al 7 jyldyń ishinde eki jarym ese óskenin eske saldy.
- Bul jumystardy da jalǵastyramyz. Ásirese, magıstratýra, doktorantýra deńgeıinde. Doktorantýranyń ózinde qazir 260 myń teńgeniń kóleminde, ony taǵy da eki esege ósirýdi durys dep kórip otyrmyz. Ǵalymdarymyzdy qoldaýymyz kerek, - dedi mınıstr.
Buǵan deıin habarlanǵandaı, Saıasat Nurbek ǵylym salasyn qarjylandyrýdyń baqylaý tetikterine túsinik berdi.
