Mınıstr mədenıet salasy qyzmetkerleriniń jalaqysy nege tómen ekenin túsindirdi
Atap aıtqanda, Májilis depýtaty Qýanysh Sultanov spıkerler nazaryn mádenıet qyzmetkerleriniń tómen jalaqysyna aýdardy.
«Arystanbek Muhamedıuly, mádenıet qyzmetkerleriniń eńbekaqysyn tóleýge túbegeıli ózgeris qajet dep esepteısiz be?», - dep suraq qoıdy depýtat.
«Shynynda da, olardyń jalaqysy az. Kópshilik jaǵdaıda ash adam shyǵarmashylyqta tabysty bolady dep jatady. Oǵan Bethoven men Motsartty mysalǵa keltiredi. Osy oraıda aıtarym, bizdiń talanttarymyz mardymsyz jalaqy alyp júrse de halyqaralyq deńgeıge shyǵyp jatyr. Ártister óz talantymen bıikterdi baǵyndyryp júrse, kitaphana, mýzeı, mádenıet úıleri syndy salalar qarjylyq qoldaýǵa muqtaj bolyp otyr», - dep jaýap berdi QR Mádenıet jáne sport mınıstri Arystanbek Muhamedıuly depýtattyń saýalyna.
Atalǵan másele boıynsha Úkimet saǵatynda QR Qarjy vıtse-mınıstri Tatıana Saveleva men QR Eńbek jáne áleýmettik qorǵaý vıtse-mınıstri Svetlana Jaqypova da sóz sóıledi.
«Mádenıet salasyndaǵy eńbekaqyny tóleý máselesi óte mańyzdy bolyp otyr. Memleket deńgeıinde olardyń jalaqysy 2005 jyldan 2011 jylǵa deıin 5 ret 25-30 paıyzǵa kóterilip otyrǵan. Sońǵy ret mádenıet qyzmetkerleriniń jalaqysy eńbekaqyny tóleýdi reformalaý aıasynda 2016 jyly 40 paıyzǵa kóbeıtildi», - dedi T.Saveleva.
Svetlana Jaqypovanyń aıtýyna qaraǵanda, ótken jyly júrgizilgen eńbekaqyny tóleý reformasy aıasynda 50 myńǵa jýyq mádenıet qyzmetkerleriniń jalaqysy ósken. Ásirese eń tómengi jalaqy alatyn kitaphanashylardyń jalaqysy 52 myńnan 70 myń teńgege deıin, arhıv qyzmetkerleriniń jalaqysy - 44 myńnan 62 myńǵa kóterilgen.
