Mınıstr: Lombardtar múlik ótkizýshilerdi sýretke túsiretin bolady
ALMATY. QazAqparat - QR ІІM basshysy Qalmuhambet Qasymov lombardtardyń jumysyna qatysty tyń aqparattarmen bólisti, dep habarlaıdy QazAqparat tilshisi
«Qylmystarǵa, onyń ishinde uıaly telefondarǵa qatysty problemalar bar. Tek qana Almatynyń ózinde 4500 telefon urlaý deregi tirkeldi. Nelikten? Sebebi bazardyń ana buryshynda turyp telefon urlap, kelesi buryshynda ony saýdaǵa aınaldyrady. Bizdiń operatorlar týra sol kezde esepke qoıady. Bul Eýropa da múmkin emes dúnıe. Al bizde múmkin... Sol sebepti, bizde telefon urlaýmen aınalysatyndarǵa jol ashyq»,- dedi mınıstr Almatyda ótken Qazaqstan Respýblıkasy men Reseı Federatsııasy ishki ister mınıstrligi áriptestiginiń tórtinshi otyrysy boıynsha ótken brıfıngte.
Mınıstr 2019 jyldyń 1 qańtarynan bastap azamattardyń barlyǵy telefondaryn JSN arqyly tirkeýge mindetteletindigi týraly aıtty. Osynyń arqasynda uıaly telefon urlyǵy azaıýy tıis. Búginde uıaly telefon urlaý barlyq jasalatyn qylmystyń 15-20 % quraıdy.
«Lombardtar bizde eshbir zańdy negizsiz jumys istep kelgen. 1997 jyly Ulttyq bank olardyń jumystaryna qatysty qaýly qabyldaǵan. Bul qujat qazir eskirdi. Bylaısha aıtqanda, lombardtar urlanǵan múlikti satý ornyna aınaldy. Urlyq jasap, múlikti lombardta ótkizip jiberýge bolady. Bul basqa elderde múmkin emes dúnıe. Biz Reseı, Germanııa, Ózbekstan elderiniń tájirıbelerin qaradyq. Sondyqtan tıisti zańǵa ózgertýler engizdik. Mamyrda qabyldanǵan Zańǵa sáıkes QR UEM Lombardtar týraly qaýly daıyndap jatyr. Endi lombardtar múlik ótkizetinderdi sýretke túsiretin bolady. Osylaısha biz múlikti zańdylyǵyn tekseremiz. Bolashaqta qylmyskerler lombardqa urlanǵan zat ótkizbeıtin bolady», - dedi Qalmuhambet Qasymov.
