Mınıstr qyzdy sýıtsıdten qutqarǵan polıtseılerdi marapattady
NUR-SULTAN. QazAqparat – Іshki ister mınıstri Erlan Turǵymbaev qyzdy sýıtsıdten qutqarǵan Nur-Cultan qalasynyń polıtseılerin marapattady. Bul týraly QazAqparat ІІM silteme jasap habarlaıdy.
Іshki ister mınıstri patrýldik polıtsııa polki vzvodynyń komandıri Almaz Qultanovqa, polk qyzmetiniń ınspektorlary Asylhan Nurmuhambetov pen Nursultan Sarıevke jedel ári úılesimdi is-áreketteri úshin jeke alǵysyn bildirip, polıtseılerdi ІІM-niń «Quqyq tártibin qamtamasyz etýge qosqan úlesi úshin»medalimen marapattady.
«Kún saıyn búkil el boıynsha myńdaǵan polıtsııa qyzmetkerleri azamattardyń qaýipsizdigi men tynyshtyǵy úshin qyzmet atqarady. Olardy qylmystyq qol suǵýshylyqtan qorǵaıdy jáne qıyn ómirlik jaǵdaıǵa tap bolǵan adamdarǵa kómektesedi. Bizdiń qatarymyzǵa kirgen árbir adam polıtsııa qyzmeti janqııarlyqty, batyldyqty jáne adamdar úshin ómir men densaýlyǵyn qaterge tigýge daıyn bolýdy talap etetinin túsinedi»,- dedi marapattaý rásimi kezinde ІІM basshysy.
Ol óz sózinde osyndaı synı jaǵdaılarda polıtsııa qyzmetkerleri birneshe sekýnd ishinde jaýapty sheshimder qabyldaýǵa májbúr ekenin, keıde mundaı sheshimder adamnyń taǵdyryn sheship jatatynyn atap ótti.
«Tek kásibılikpen jáne óz mindetterine jaýapkershilikpen qaraý, ár adamnyń problemalaryna nazar aýdarý arqyly ǵana senimge qol jetkizýge bolady. Siz jáne sizdiń áriptesterińiz aldaǵy ýaqytta da óz qyzmettik boryshyn úlgili jáne janqııarlyqpen atqaratynyna senimdimin», - dedi Erlan Turǵymbaev marapattalǵandarǵa.
Eske sala keteıik, 3 qazan kúni elordalyq polıtseı Almaz Qultanov Qabanbaı batyr dańǵylyndaǵy kópirden sekirgen qyzdy jaǵaǵa alyp shyqty. Keıin Nur-Sultan qalasynyń densaýlyq saqtaý basqarmasy elordada kópirden sekirip ketken júkti áıeldiń jaǵdaıy týraly málimet berdi.
