Mınıstr kúndizgi jáne syrttaı oqý bólimderi stýdentteri sanynyń ara-qatynasyn asyryp otyrǵan JOO-larǵa tıisti shara qoldanýdy tapsyrdy
ASTANA. Jeltoqsannyń 4-i. QazAqparat /Gúlmıra Álıakparova/ - QR Bilim jáne ǵylym mınıstri Janseıit Túımebaev kúndizgi jáne syrttaı oqý bólimderi stýdentteri sanynyń ara-qatynasyn shekten asyryp otyrǵan ýnıversıtetterge qatysty tıisti shara qoldanýdy tapsyrdy,
dep habarlaıdy QazAqparat.
Búgin Bilim mınıstrliginiń alqa májilisinde J.Túımebaev, «Qazaqstan Respýblıkasynyń bilim berý júıesi. Bilim alýshylar kontıngenti» standartyna sáıkes, joǵary oqý oryndary olarda kúndizgi oqý bóliminiń stýdentteri bolǵan jaǵdaıda ǵana syrttaı oqý bólimi boıynsha kásiptik oqý baǵdarlamalaryn iske asyra alatynyn tilge tıek etip, talap boıynsha kúndizgi jáne syrttaı oqý bólimderi stýdentteriniń araqatynasy 4:1 quraýy tıistigin (25 paıyzdy) aıtty .
Mınıstrdiń aıtýynsha, bul talaptardy birqatar joǵary oqý oryndary oryndap otyrǵanymen, ony elemeı otyrǵandary da bar. Mysaly, «Femıda» Zań akademııasynyń, Shymkent áleýmettik-pedagogıkalyq ýnıversıtetinde syrttaı bilim alýshylar kontıngenti kúndizgi bólimde bilim alatyndarǵa qaraǵanda - 5 esege, Ó.Joldasbekov atyndaǵy Ekonomıka jáne quqyq akademııasynda - 6 esege, Qaztutynýshylar Qaraǵandy ekonomıkalyq ýnıversıtetinde - 7 esege artyq.
«Osy oraıda Bilim jáne ǵylym salasyndaǵy baqylaý komıteti men Joǵary jáne joǵary oqý ornynan keıingi bilim departamentine tıisti sharalar qoldanýdy tapsyramyn», - dedi ol.
