Mınıstr Qýantyrov Ulytaý oblysyndaǵy Annenskaıa shahtasyna tústi

JEZQAZǴAN. QazAqparat – Ulytaý oblysyna jumys sapary barysynda Ulttyq ekonomıka mınıstri Álibek Qýantyrov Annenskaıa shahtasyna túsip, mys óndirýdiń tehnologııalyq protsesimen tanysty, kenshilermen áńgimelesti. QazAqparat bul týraly mınıstrliń málimetine silteme jasap habarlaıdy.

Annenskaıa shahtasy Sátbaev qalasyndaǵy Shyǵys-Jezqazǵan kenishinde ornalasqan.

Ken ornynda 1780 adam jumys isteıdi. Ortasha jalaqy – 762 myń teńge.

Sondaı-aq, mınıstrlik basshysy «Kazakhmys Smelting» quramyna kiretin Jezqazǵan mys balqytý zaýytynyń jumysymen tanysty. Kásiporyn 497 myń tonna kóleminde mys kontsentratyn óńdeıdi jáne jylyna 178 myń tonna katodty mys óndiredi.

Jezqazǵan mys balqytý zaýytynda 2 myńnan astam adam turaqty jumys oryndarymen qamtamasyz etilgen. Metallýrgterdiń ortasha jalaqysy aıyna 518 myń teńgeni quraıdy.

Atap aıtqanda, mınıstr birneshe tsehty aralap kórip, kásiporynnyń jumys barysymen tanysty. «Kazakhmys Smelting» kompanııasynyń bas dırektory Jánibek Baıǵabelov zaýytty jańǵyrtý, óndiristiń kelesi kezeńderin iske qosý týraly josparlarymen bólisti. Sondaı-aq ol problemaly máselelerdi kóterdi, onyń ishinde gaz jáne jabyq vagondardyń tapshylyǵy.