Mınıstr qorshaǵan ortany qorǵaý josparyn oryndamaǵan ákimderdi zańmen jazalaýdy usyndy

ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev ákimderdi qorshaǵan ortany qorǵaý josparyn oryndamaǵany úshin zańmen jazalaýdy usyndy.

Májilis depýtattarynyń aldynda eldiń ekologııalyq ahýaly týraly baıandaǵan mınıstr búginde qorshaǵan ortany qorǵaý jónindegi is-sharalar jospary barlyq óńirlerde qabyldanǵanyn málim etti. Onyń ishinde 7 óńirde qarajat talap etiletin deńgeıden tómen kólemde qarastyrylǵan kórinedi.

«Sonymen qatar, Astana qalasy, Aqmola, Túrkistan, Jetisý oblystary sııaqty jekelegen óńirlerde birneshe ese kóp qarajat josparlanǵan. Jalpy josparlarda 521,7 mlrd teńgege is-sharalar kózdelgen. Bul rette josparlanǵan is-sharalardy oryndamaǵany úshin jergilikti atqarýshy organdardyń jaýapkershiligi zań júzinde bekitilmegen. Osyǵan baılanysty zańnamaǵa tıisti ózgerister engizý usynylady», - dedi Erlan Nysanbaev.

Osyǵan deıin QR Ekologııa jáne tabıǵı resýrstar mınıstri Erlan Nysanbaev Kaspıı ıtbalyqtarynyń qyrylýyna Qashaǵan kenishindegi jobanyń qatysy bar ma, degen saýalǵa pikir bildirdi.