Mınıstr koranovırýs týrasynda: Qaýip múldem joq deýge bolmaıdy

NUR-SULTAN. QazAqparat – QR Densaýlyq saqtaý mınıstri Eljan Birtanov koronavırýs indeti sımptomsyz aýrýlardy emdeý tásili týraly aıtyp berdi, dep habarlaıdy QazAqparat tilshisi.

«Keıbir sharalardy jeńildetý karantınniń toqtaǵanyn bildirmeıdi. Karantın sharalary – ol óndiristik qyzmet, qoǵamdyq kólik jáne basqalar boıynsha tıisti shekteýlerdiń toptasýy. Olar epıdemııalyq táýekeldermen baılanysty. Osy jaǵdaıda keıbir qalalar arasynda áýe tasymaly turǵysynda sharalardy jeńildetý qadamdary qabyldandy», - dedi E. Birtanov «Habar24» arnasyna bergen suhbatynda.

Onyń sózine qaraǵanda, táýekel deńgeıin eskere otyryp, bul qadamdar arqyly áýe tasymaldaryn jasaýǵa múmkindik bolyp tur.

«Alaıda qaýip múldem joq dep oılaýǵa bolmaıdy. Biz bul baǵyttaǵy sharalardy birtindep iske asyrýdamyz. Sondyqtan PTR-testilerdi talap etý qazirgi kezde oryndy. Іndet juqtyrý tómendegenine qaraı, osydan bas tartyp, halyqtyń barlyq sanattary arasynda tańdamaly testileýge kóshýimiz múmkin. Osy oraıda epıdemıologııalyq zerthanalyq qadaǵalaý eskeriledi, ıaǵnı teńdeı úılesimde qoǵamnyń barlyq ókilderinen kezdeısoq tańdaý tásilimen zertteýler alynady», - dedi mınıstr.

Onyń paıymynsha, sol kezde epıdemııa men qaýiptiń qandaı deńgeıi týraly tıisti túsinik paıda bolady.

«Degenmen osyǵan aýysýǵa áli erterek, bizde arý oshaqtary tirkelgen óńirler bar», - dedi E. Birtanov.