Mınıstr kommýnaldyq jelileri tozǵan óńirlerdi atady

ASTANA. QazAqparat – Qazaqstanda jylý, sýmen jabdyqtaý jáne sý burý jelileri 51% tozǵan. Bul týraly QR ındýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Búgingi tańda respýblıka boıynsha 128 myń shaqyrymǵa jýyq jylý, sýmen jabdyqtaý jáne sý burý jelileri bar. Jelilerdiń jalpy tozýy - 51%. Mınıstrlik jelilerdi jańǵyrtý jáne rekonstrýktsııa jumysyn negizinen respýblıkalyq bıýdjet esebinen júrgizedi», - dedi mınıstr Úkimet otyrysynda.

Onyń aıtýynsha, 2030 jylǵa qaraı kommýnaldyq jelilerdiń jalpy tozý kórsetkishin 40% deıin tómendetý mindeti tur.

Tozýdy tómendetý boıynsha nysanaly ındıkatorlar belgilenip, óńirlerge jetkizildi.

«Búgingi tańda kommýnaldyq jelilerdiń eń kóp tozýy Pavlodar (68%), Shyǵys Qazaqstan (64%), Qaraǵandy (62%) jáne Ulytaý oblystarynda (62%) saqtalyp otyr. Bıyl 126 shaqyrym jylý jelilerin jańǵyrtýǵa 86 mlrd 300 mln teńge bólindi. 3 aıdyń ishinde 23 shaqyrym jylýmen jabdyqtaý jelileri salyndy, bul - jalpy jospardyń 18 paıyzy», - dedi M. Qarabaev.

Sýmen jabdyqtaý jáne sý burý júıelerin salýǵa, sondaı-aq rekonstrýktsııalaýǵa bıyl respýblıkalyq bıýdjetten 280 mlrd teńge bólindi.

Jyl sońyna qaraı ortalyqtandyrylǵan sýmen jabdyqtaý 120 aýylǵa jáne 4 qalaǵa 100% qoljetimdi bolady.