Mınıstr kólik apattary týraly: Kóbinde júrgizýshilerdiń ózi kináli
NUR-SULTAN. QazAqparat – QR Іshki ister mınıstri Erlan Turǵymbaev temir jol ótkelderinen avtokólikpen ótý talaptary kúsheıtý máselesi qaralatynyn jetkizdi, dep habarlaıdy QazAqparat tilshisi.
«Bizde jol-kólik oqıǵalarynyń 96 paıyzynda júrgizýshilerdiń ózderi kináli bolyp shyǵady. Nashar júrgizýshilik tártip qalyptasqan. Bizde barlyq temirjol ótkelderine jaqyndaǵanda poıyzdyń júretinin eskertetin jol belgileri turady. Úsh jolaq, eki jolaq, sodan keıin bir jolaqtan keıin «Stop» degen belgini kóresiz. Osydan keıin mindetti túrde jan-jaqqa qarap, poıyz bar ma, joq pa kóz jetkizip alý kerek. Bul jaǵdaıda júrgizýshilerdiń jaýapkershiligin kúsheıtý máselesi bar. Sondyqtan, biz atalǵan máseleni qarap, tıisti usynystardy engizemiz», - dedi QR Іshki ister mınıstri Erlan Turǵymbaev OKQ-da ótken baspasóz máslıhatynda.
Eske sala ketsek, keshe Shamalǵan stantsııasynda poıyz ben avtobýs soqtyǵysqan bolatyn. Aldyn ala boljam boıynsha, avtobýs temir joldyń relsine shyǵyp ketken.
Oqıǵa ornynda avtobýs júrgizýshisi mert bolyp, taǵy 3 adam Qarasaı aýdandyq aýrýhanasynyń jansaqtaý bóliminde jatyr. Onyń ekeýi bala.
Qazir atalǵan fakti boıynsha QR QK 345-babynyń 3-tarmaǵy boıynsha is qozǵalyp, tergeý júrip jatyr. Іstiń tergelýin Bas kóliktik prokýratýra ózbaqylaýyna aldy.
QR Prezıdenti Qasym-Jomart Toqaev Aqseńgir-Shamalǵan temirjol ótkelinde poezd ben avtobýs soqtyǵysynan japa shekkenderdiń týǵan-týystaryna kóńil aıtty.
