Mınıstr Kókjıde aýmaǵynda munaı óndirýdi kezeń-kezeńimen toqtatýdy usyndy
«Aqtóbe oblysyndaǵy Kókjıde jerasty sýynyń munaı ónimderimen lastanýy - nazar aýdarýdy qajet etetin mańyzdy másele bolyp otyr. Kókjıde ýltrapressti jerasty sýy batys óńirde biregeı sanalady jáne onyń áleýetin sapaly aýyz sýǵa tapshy Aqtóbe, Atyraý jáne Mańǵystaý oblystarynyń halqyn sýmen qamtamasyz etýge paıdalanýǵa bolady», - dedi Ekologııa mınıstri Úkimet otyrysynda.
Mınıstrdiń aıtýynsha, Kókjıde aýmaǵynda 8 jer qoınaýyn paıdalanýshy kómirsýtek shıkizatyn barlaý jáne óndirý jumystaryn júrgizýde.
«Ártúrli kezeńde memlekettik organdar men jergilikti atqarýshy organdar Kókjıde aýmaǵynda jer asty sýlarynyń munaı ónimderimen lastaný faktilerin anyqtaǵanyn aıta ketken jón. Osyǵan baılanysty Kókjıde sý qoryn qosymsha barlaý jumystary júrgizildi. Táýligine 173,4 myń tekshe metr kóleminde jerasty sýynyń qory bekitildi jáne Kókjıde ken ornynyń shekarasy anyqtaldy. Jer qoınaýyn paıdalanýshylardyń vedomstvolyq jelisiniń uńǵymalary boıynsha synama men taldaý alynyp, qospalardyń bar ekendigin kórsetti. Alaıda, munaı ónimderi boıynsha shekti ruqsat etilgen kontsentratsııadan asyp ketý faktisi anyqtalmaǵan», - dedi S. Brekeshev.
Jerasty sýynyń lastanýyna jol bermes úshin Ekologııa mınıstri Úkimet basshysyna ótinish jasady.
Atap aıtqanda Kókjıdeniń shekarasy sheginde jer qoınaýyn paıdalanýshylardyń qyzmetin kezeń-kezeńimen toqtatý boıynsha shara qabyldaýdy, al Aqtóbe oblysynyń ákimdigine jerasty sýynyń monıtorıngin kúsheıtýdi tapsyrýdy surady.
Aıta keteıik, Aqtóbedegi Kókjıde ken ornyndaǵy munaı óndirý jumysyn toqtatyp, taza aýyz sýdy saqtaý máselesi jıi kóterilip júr.
