Mınıstr keı óńirlerdegi elektr energııasynyń ajyratylýyna qatysty túsinik berdi
ASTANA. KAZINFORM – Energetıka mınıstri Erlan Aqkenjenov 14 tamyzda Qazaqstannyń ońtústik óńirlerinde elektr qýatynyń ajyratylýyna qatysty pikir bildirdi. Ol elektr qýatyn tez arada qalpyna keltirgen júıe operatorynyń jumysyna joǵary baǵa berdi.
— 14 tamyzda saǵat 14:37-de Ortalyq Azııanyń energetıkalyq júıesinde generatsııalaýshy jabdyqtyń ajyraýy boldy. Bul irkilistiń sebebin jalpy qýaty shamamen 625 megavatt bolatyn Toqtaǵul sý elektr stantsııasynyń №1 jáne №2 gıdrogeneratory jumysymen baılanystyramyz. Qolda bar aqparatqa sáıkes, Ortalyq Azııanyń kórshiles energetıkalyq júıelerindegi jumys rejımderiniń ózgerýi Qazaqstannyń Birtutas energetıkalyq júıesiniń Ońtústik aımaǵynda qýat aǵyndarynyń qaıta bólinýine ákep soqty. Nátıjesinde, energetıkalyq júıede Qazaqstannyń soltústigi men ońtústigi bólindi. Bul rette ońtústik aımaq oqshaýlanǵan rejımde jumysyn jalǵastyrdy, - dedi Erlan Aqkenjenov Úkimet otyrysynan keıin tilshiler suraǵyna jaýap bere otyryp.
Onyń aıtýynsha, tizbekti reaktsııa saldarynan birneshe óńirde - negizinen Qazaqstannyń ońtústiginde elektr energııasy óshti. Júıelik operator – KEGOC kompanııasy on mınýt ishinde tıisti sharalar qabyldady. Osy oraıda Qaraǵandy, Ulytaý jáne Abaı oblystaryndaǵy shekteýler alynyp tastaldy. Saǵat 16:12-de Almaty jáne Jetisý oblystarynda elektr energııasymen jabdyqtaý qalpyna keltirildi. Osylaısha, ońtústik energetıkalyq aımaq Qazaqstannyń Birtutas energetıkalyq júıesimen sınhrondaldy.
— Shyn máninde, bul oqıǵa bizdiń relelik qorǵanys jáne avtomatıka júıelerimizdiń qanshalyqty tıimdi jumys istegeniniń aıqyn mysaly boldy. Júıelik operator Qazaqstannyń búkil elektr jelisin nebári eki jarym saǵat ishinde qaıta qalpyna keltire aldy. Máselen, Ystanbulda bul protseske birneshe kún ketti, al Tbılısıde toǵyz saǵatqa sozylǵan edi. Al bizdiń júıelik operator jelini bar bolǵany eki jarym saǵatta iske qosty. Sondyqtan Energetıka mınıstri retinde KEGOC-tyń jumysyna oń baǵa beremin. Árıne, áli de jetildiretin tustary bar, - dedi mınıstr.
Atalǵan oqıǵa boıynsha memlekettik komıssııa quryldy. Olar jaqyn arada egjeı-tegjeıli qorytyndysyn jarııalaıdy.
Eske salsaq, 14 tamyzda QR Energetıka mınıstrligi Qazaqstannyń keı óńirlerindegi elektr energııasynyń ajyratylýyna túsinikteme berdi.
