Mınıstr qazaqstandyqtardy dıplom satyp alamyn dep aldanyp qalmaýǵa shaqyrdy

NUR-SULTAN. QazAqparat - QR Bilim jáne ǵylym mınıstri Ashat Aımaǵambetov áleýmettik jelilerdegi joǵary oqý oryndarynyń dıplomdarynyń satylatyndyǵy týraly habarlandyrýǵa qatysty pikir bildirdi, dep habarlaıdy QazAqparat.

«Internette (facebook, instagram) belgisiz adamdardyń joǵary bilim týraly dıplomnyń satylatyndyǵy týraly aqparaty bar jarnama tarata bastady. Olar aldyn ala tólem jasaýdy usynyp, barlyq joǵary oqý oryndarynyń tizilimi men bazalyq málimetterinde maquldanýyna kepildik beredi. Bul aqparat alaıaqtyq jasaýdyń ádisi sanalady. Qyraǵy bolyńyzdar jáne qaskúnemderdiń Sizderdi adastyrýyna jol bermeńizder», - dep jazdy mınıstr Facebook paraqshasynda.

Onyń atap ótýinshe, atalǵan fakti boıynsha jobalyq keńse aldyn ala tekserý júrgizgen. Alaıaqtar shynaıy ári zańdy berilgen dıplomdar men olardyń qosymshalarynyń sýretterin paıdalanǵan. Olardyń ıeleri 4 jyl boıy bilim berý baǵdarlamasyn tolyq ıgergennen keıin ǵana atalǵan dıplomdardy alǵan.

«Alaıaqtar ózderiniń qyzmetiniń jarnamasy úshin dıplomdarynyń sýretin paıdalanǵan joǵary oqý oryndaryna biz atalǵan qujattary tekserý jáne jeke-jeke sáıkestendirý týraly saýal jiberdik», - dep atap ótedi Ashat Aımaǵambetov.

Mınıstrdiń sózine qaraǵanda, QR Bilim jáne ǵylym mınıstrligi zańǵa qaıshy mundaı aqparattardyń jáne qylmystyq árekettiń jolyn kesý boıynsha birlesken sharalar ázirleý maqsatynda Nur-Sultan qalalyq polıtsııa departamentine, QR Sybaılas jemqorlyqqa qarsy is-qımyl agenttigine úndeý ázirlengen.