Mınıstr Qazaqstandaǵy qaýipti bes aýrýdyń túrin atady

ASTANA. QazAqparat - Qazaqstanda ınfektsııalyq emes aýrýlar deńgeıi joǵarylap keledi. Búgin Májilistegi «Nur Otan» partııasy fraktsııasynyń keńeıtilgen jınalysynda QR Densaýlyq saqtaý jáne áleýmettik damý mınıstri Tamara Dúısenova málim etti. Eske salaıyq, fraktsııa otyrysynda «Ólim kórsetkishi joǵary aýrýlarmen kúresý boıynsha memlekettiń atqaryp jatqan júıeli sharalary» taqyryby talqylanǵan bolatyn.

«Búgingi kúni respýblıkamyzda, búkil álemdegi sekildi ınfektsııalyq emes aýrýlar túriniń deńgeıi joǵarylap otyr. Máselen, ólim-jitim kórsetkishinde qaıtys bolýdyń jartysyna jýyǵy qan aınalymy júıesi aýrýlaryna tıesili - 26 paıyz, asqynǵan mıokarda ınfarkti - 5,5 paıyz, qaterli isikter - 13 paıyz, jaraqat alýdan bolatyn aýrýlar - 11 paıyz, bosaný barysynda jáne balalar aýrýlary - 3,6 paıyz. Sarapshylardyń esepteýinshe, osy dertter boıynsha shyǵyndar Qazaqstanda kútiletin ómir súrý uzaqtyǵyn 8 jylǵa deıin qysqartady», - dedi mınıstr T. Dúısenova.

Onyń aıtýynsha, 2016-2019 jyldarǵa arnalǵan «Densaýlyq» jańa baǵdarlamasynda joǵaryda atalǵan 5 aýrý túrlerin emdeý men aldyn alýǵa basa nazar aýdarylady. Óıtkeni, dál osy bes baǵyttaǵy aýrý túrleri el demografııasyna aıtarlyqtaı áser etedi.