Mınıstr Qazaqstandaǵy egistikterdiń jaı-kúıine qatysty pikir bildirdi
«Aǵymdaǵy jyly aýyl sharýashylyǵy daqyldarynyń jalpy egis alańy 23 mln gektardy qurady (bul 2020 jylmen salystyrǵanda 322 myń gektarǵa kóp). Dándi jáne dándi-burshaqty daqyldar 15,9 mln ga (onyń ishinde bıdaı – 12,9 mln. ga), maıly daqyldar - 3,1 mln ga, kókónister men baqsha daqyldary jáne kartop - 473,8 myń ga, maqta - 109,7 myń ga, qant qyzylshasy - 21,7 myń ga, mal azyǵy daqyldary 3,2 mln ga alańda ornalasqan», - dedi E. Qarashókeev.
Onyń aıtýynsha, egis naýqany sapaly tuqymdardy qoldana otyryp, ońtaıly merzimde júrgizilgen. Fermerler tyńaıtqyshtardy ýaqytynda qoldandy, egistikterde aramshópter men aýrýlarǵa qarsy hımııalyq óńdeýdi der kezinde júrgizdi.
«Sonymen qatar, bıylǵy jyly topyraqtaǵy jáne atmosferadaǵy qalyptan tys qurǵaqshylyqqa baılanysty dándi daqyldar egisteriniń jaı-kúıi aıtarlyqtaı nasharlady jáne bul Qazaqstanda ǵana bolyp jatqan jaǵdaı emes. Egistikterdiń kúıiniń nasharlaý tendentsııasy búkil álemniń astyq egetin kóptegen elderine áser etti. Mysaly, Amerıka Qurama Shtattary Aýyl sharýashylyǵy mınıstrliginiń jáne Halyqaralyq astyq keńesiniń málimeti boıynsha Kanadada bıdaıdyń jalpy túsimi ótken jylmen salystyrǵanda 31,6%-ǵa, AQSh-ta 4,4%-ǵa, kórshiles Reseıde 15%-ǵa tómendeýi múmkin», - dedi mınıstrdiń mindetin atqarýshy.
Oblystar ákimdikteriniń derekteri boıynsha búgingi tańda dándi daqyldar egistikteriniń jaı-kúıi bylaı baǵalanýda:
- 13,2 mln gektarda nemese dándi daqyldardyń jalpy egis kóleminiń 85,2%-ynda jaqsy jáne qanaǵattanarlyq kúıde;
- 2,1 mln gektarda nemese 13,7%-ynda nashar kúıde;
- 178,3 myń gektarda nemese 1,1%-ynda egister joıylǵan.