Mınıstr Qazaqstanda jasalǵan órt sóndirý kólikterin tanystyrdy
Indýstrııalandyrý baǵdarlamasy sheńberinde «KamAZ» ınjınırıng» nemistiń Metts kompanııasymen birlesip, óziniń bazasynda 32 metrlik satysy bar arnaıy órt sóndirý kóligin jasap shyǵardy.
«Bul óte sapaly avtosatylar bizdiń elde tuńǵysh ret jasalyp otyr. Atalmysh joba bizdiń elde bıik ǵımarattarda órt sóndiretin kólikterdi qurastyrý jelisin qalyptastyrýǵa arnalǵan serpindi joba», - deıdi V. Bojko.
32 metrlik saty 10 qabatty úıdiń bıiktigin qamtıdy. Onda órt sóndirýge arnalǵan avtomattandyrylǵan sý qurylǵylary men adamdardy qutqarýǵa qajetti zembil ornatylǵan.
«Biz bolashaqta olardyń sanyn arttyratyn bolamyz. Kelesi jylǵy qarjy jospary boıynsha, osyndaı 3 órt sóndirý avtosatylaryn satyp alý kózdelýde. Degenmen bul tym az, sebebi Qazaqstanǵa atalmysh qurylǵylar tym qajet. Keleshekte órt sóndirý quraldary tolyqtaı aýystyrylady. Atalmysh maqsatqa jyl saıyn 5 mlrd. teńge bólinip keledi. Joba elimizdiń órt sóndirý qyzmetindegi tehnıka jetispeýshiligi máselesin jaýyp, tolyqtaı qazaqstandyq ónimge kóshýge múmkindik bermek», - dep atap ótti mınıstr.
Sondaı-aq, «Oralagroselmash» zaýytynda qurastyrylǵan 20 órt sóndirý kóligi tanystyryldy.
Vedomstvo basshysynyń aıtýynsha, Qazaqstanda qazirgi ýaqytta 1,5 myń órt sóndirý kóligi men 247 satysy bar tehnıka jetispeıtin kórinedi. Sońǵy jeti jylda órt sóndirý qyzmetterine ár túrli fýnktsıonaldyq maqsattary men úlgi qataryndaǵy 8 júzge tarta avtokólik satyp alynǵan. Onyń 40 paıyzy - otandyq óndirýshilerdiń ónimi.
