Mınıstr Qazaqstanda uıaly telefondardyń urlyǵyn jyl sońyna deıin sheshýge ýáde etti
ASTANA. QazAqparat - QR Іshki ister mınıstri Qalmuhanbet Qasymov Qazaqstanda uıaly telefondardyń urlyǵyn tyıý osy kúnge deıin nelikten múmkin bolmaı kelgendigin aıtyp berdi.
«Elimizde jasalatyn barlyq qylmystardyń 60-63 paıyzy - urlyq. Urlyqtyń 25-27 paıyzy uıaly telefondarǵa qatysty bolyp otyr. Biz úshin uıaly telefondardyń urlyǵy óte úlken máselege aınaldy. Kóptegen elderde eger telefon urlanatyn bolsa, buǵattap tastaıdy. Demek, ony urlaýdyń ózi qısynsyz. Sondyqtan AQSh-ta uıaly telefon urlyǵy múldem joq dese de bolady. Telefon taýyp alsa, birden qaıtaryp beredi.
Nege biz de solaı isteı almaımyz?! Sebebi bizdiń elge kontrafaktilik telefondar óte kóp enip ketti. Sol sebepti eger uıaly telefon urlanǵan kezde, polıtseıler onyń IMEI-kody arqyly buǵattasa, birden 50-100 kontrafaktilik jolmen kelgen telefon buǵattalyp qalady», - dep atap ótti Q.Qasymov.
Mınıstrdiń aıtýynsha, ol úshin Qazaqstan uıaly telefondar naryǵyn retke keltirýi tıis.
«Urlyqpen tıimdi kúresý úshin, uıaly telefondardyń zańsyz elge kelýin doǵarý qajet. Uıaly operatorlar olarǵa qyzmet kórsetýden bas tartsyn. AQSh-taǵy sııaqty uıaly telefondardyń barlyǵy jeke tulǵaǵa tirkelýi tıis. Kontrafaktilik telefondardy anyqtaý úshin biz ár telefonǵa tórt sannan turatyn JSN beremiz. Bizdiń arnaıy qyzmet uıaly telefondardy jeke tulǵaǵa tirkeýge bolatyndaı etip jasaı alady», - dedi ol.
Onyń aıtýynsha, tek tirkelgen telefondy ǵana qashyqtyqtan buǵattaýǵa bolady. Qazirgi ýaqytta Almatyda 200 myń urlanǵan telefon buǵattalǵan. Mınıstr uıaly telefondardyń urlyǵyn jyl sońyna deıin sheshýge ýáde etti.
