Mınıstr Qazaqstan halyqaralyq týrızm naryǵyna ene alady dep sanaıdy
ASTANA. QazAqparat - Qazaqstanda halyqaralyq týrızm naryǵyna ený perspektıvalary bar. Búgin Májilistegi Úkimet saǵatynda elimizdegi týrızm salasyn damytý perspektıvalary jaıynda baıandaǵan QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev osylaı málim etti.
Mınıstrdiń paıymynsha, Qazaqstanda týrızm salasy qarqyndy damyp keledi, degenmen onda birqatar problemalyq máseleler barshylyq. «Bular - týrızm salasyndaǵy qyzmetke baǵanyń joǵarylyǵy, ınfraqurylym men servıstiń jetkilikti túrde damymaýy, vıza men basqa da sharalardyń kúrdeliligi. Degenmen, Qazaqstanda halyqaralyq týrızm naryǵyna enýdiń joǵary perspektıvalary bar», - dedi Á. Isekeshev.
Mınıstrdiń sózine qaraǵanda, halyqaralyq týrızm ósiminiń úshten eki bóligi kórshiles memlekettermen qamtamasyz etiledi. Qazaqstan úshin bul shamamen on mıllıon týrısterdi qamtıdy jáne buǵan Qytaı, Reseı, Taıaý Shyǵys pen Eýropany jatqyzýǵa bolady.
«Bul bizdiń elimiz úshin yqtımal áleýet bolyp tabylady. Sondyqtan da, Prezıdenttiń Joldaýynda Úkimetke týrızmdi damytýǵa júıeli qadam jasaý týraly tapsyrma berilgen bolatyn. Biz osyǵan oraı, elimizde týrızmdi damytýdyń 2020 jylǵa deıingi tujyrymdamasyn ázirledik ári ony engize bastadyq», - deıdi Á. Isekeshev.
