Mınıstr «Qazaqfılmdegi» jóndeý jumysy qashan bitetinin aıtty

NUR-SULTAN. QazAqparat – Mádenıet jáne sport mınıstri Aqtoty Raıymqulova hel aldyndaǵy esebi kezinde «Qazaqfılm» aktsıonerlik qoǵamyndaǵy jańǵyrtý jumystarynyń qalaı júrip jatqany týraly málimet berdi , dep habarlaıdy QazAqparat tilshisi.

«2021 jyldan bastap Sháken Aımanov atyndaǵy «Qazaqfılm» aktsıonerlik qoǵamynda jańǵyrtý jumysy bastaldy. Ol úsh jyl boıy jalǵasady. Joba kınostýdııany tehnıkalyq qaıta jaraqtandyrýdy, ınjenerlik jeliler men ǵımarattarǵa kúrdeli jóndeý júrgizýdi, sondaı-aq túsirilim alańyn salýdy jáne basqalardy kózdeıdi. Atalǵan sharalar kınostýdııany ózin-ózi tolyq qamtamasyz etýge jáne zamanaýı kıno fabrıkasy retinde jumys isteýge múmkindik beredi», - dedi Mádenıet jáne sport mınıstri halyqpen kezdesý barysynda.

Ol qazir pandemııaǵa baılanysty shekteýlerdiń áserinen túsirilim protsesi toqtatylǵanyn eske saldy.

«Shekteýlerge qaramastan, 2020 jyly demeýshilik kómek esebinen nysanǵa kógildir otyn tartyldy. Bul shamamen 50 mıllıon teńgeni únemdeýge múmkindik berdi. 2020 jyldyń basynan búgingi kúnge deıin «Qazaqfılm» AQ 65 halyqaralyq kınofestıvalge qatysyp, 32 syılyqqa ıe bolǵan 27 fılm shyǵardy. Bıyl 14 fılm jeti halyqaralyq kınofestıvalge qatysty», - dedi Aqtoty Raıymqulova.

Mádenıet mınıstri Aqan Sataevtyń «Tomırıs» fılmi 2020 jyly L'Etrange Festival kınofestıvalinde gran-prı alýyn otandyq kıno ındýsrııanyń jetistigi dep atady.

«Táýelsiz Qazaqstan tarıhynda tuńǵysh ret «Tomırıs» fılminde trıýk oınaǵan Nomad Stunts kaskaderlik toby álemdik kaskaderler akademııasynyń «Taýrýs» syılyǵyn aldy. TMD-daǵy Kann festıvali syılyǵynyń jalǵyz ıegeri qazaqstandyq aktrısa Samal Eslıamova «NIKA» reseılik ulttyq kınojúldesinde «úzdik áıel róli» úshin marapatqa ıe boldy», - dep qosty Aqtoty Raıymqulova.