Mınıstr: «QazAgronyń» bankrotqa ushyraýyna jol bermeımiz

ASTANA. QazAqparat -  «QazAgronyń» qarjylyq jaǵdaıy turaqtandyrylady. Bul týraly Májilistegi Úkimet saǵatynan keıin tilshilerge  QR Premer-Mınıstriniń orynbasary-Aýyl sharýashylyǵy mınıstri Ómirzaq Shókeev málim etti, dep habarlaıdy QazAqparat tilshisi.

Atap aıtqanda, Ó. Shókeev 2017-2021 jyldarǵa arnalǵan AÓK-ni damytý baǵdarlamasyna túzetýler engizý taqyrybynda baıandama jasady. Bul oraıda birneshe salalyq baǵdarlamalar qamtylmaq.  

«QazAgro» xoldınginiń shyǵyndaryna toqtalǵan Ó. Shókeev: «Keıingi 5-6 aıda «QazAgronyń» qarjylyq jaǵdaıyn turaqtandyrýǵa qatysty eleýli áreketterdi jasap jatyrmyz. Onyń eki sebebi bar. Birinshiden, holdıng sheteldik naryqtardan valıýtamen nesıe alǵan. Keıin sol valıýtalyq nesıeni ekinshi deńgeıdegi bankterge teńgemen ornalastyrǵan. Devalvatsııadan soń úlken baǵamdyq aıyrmashylyq qalyptasty. Ekinshiden, qarjy keıbir turaqsyz bankterge salynǵan. Sol jerde 58 mlrd teńge keıinge shegerilip qaldy. Osy eki faktordy eskere kele, 1 mlrd dollardan astam tapshylyq paıda boldy», - dedi.

Osy oraıda ol byltyrdan bastap bul baǵytta tıisti jumystar júrgizilgenin, úlken qarqynmen kapıtaldy ulǵaıtý jumystary atqarylyp jatqanyn jetkizdi.

«Budan bólek, burynǵy valıýtamen alynǵan qaryzdy teńgemen aýystyrý úshin áreketter jasalýda. «QazAgro» Úkimettiń aýyl sharýashylyǵy salasyndaǵy negizgi operatory. Sondyqtan «QazAgronyń» bankrotqa ushyraýyna nemese basqasha sheshimderge jol bermeımiz. Sáıkesinshe, barlyq jaǵdaıdy turaqtandyramyz», - dep túıdi Ómirzaq Shókeev.