Mınıstr «Qaırat»-«Real Madrıd» matchy bılet baǵasyna qatysty: memlekettiń aralasýǵa quqy joq

ASTANA. KAZINFORM – Týrızm jáne sport mınıstri Erbol Myrzabosynov álem nazaryn aýdarǵan Almatyda ótetin «Qaırat» pen «Real Madrıd» fýtbol matchyna qatysty pikir bildirdi.

- Qazir bar nazardy chempıondar lıgasynyń óz alańymyzda ótetin matchqa daıyndyqqa aýdaryp otyrmyz. Almatydaǵy stadıon ÝEFA-nyń tórtinshi sanattaǵy arenasy, standarttarǵa sáıkes keledi, oıyndy sonda ótkizýdi josparlap otyrmyz, - dedi Erbol Myrzabosynov Parlamenttiń birlesken otyrysynan keıin BAQ ókilderiniń saýalyna jaýap bere turyp.

Mınıstrdiń aıtýynsha, atalǵan stadıonda buǵan deıin de joǵary deńgeıdegi is-sharalar ótkizilgen.

- Solardyń aıasynda daıyn ekenimizdi, ınfraqurylymnyń aýqymdy is-sharany ótkizýge ázir ekenin kórdik. «Realmen» ótetin matchqa ÝEFA kvotasyna sáıkes shamamen 4–5 myń týrıst keledi dep josparlanyp otyr, - deıdi ol.

Sondaı-aq vedomstvo basshysy match bıletiniń qunyna qatysty oıyn ortaǵa saldy.

- Qazir bılet baǵasyna qatysty naqty aqparat joq, bul baǵytta klýb ÝEFA-men birlesip jumys istep jatyr. Barlyq aqparat klýbtyń resmı saıtynda jarııalanady. Bul klýb pen ÝEFA arasyndaǵy kelisim, memlekettiń aralasýǵa quqyǵy joq, - dep qysqa qaıyrdy Týrızm jáne sport mınıstri.

Eske salaıyq, 30 qyrkúıekte almatylyq «Qaırat» 2025/26 maýsymyndaǵy Chempıondar lıgasynyń negizgi kezeńinde «Real Madrıdke» qarsy oınaıdy. 

Araǵa ýaqyt salyp «Real» basshylyǵy «Qaıratqa» qarsy match týraly pikir bildirdi. 

Aıta keteıik, «Qaırat» — «Real Madrıd» matchynyń bıletterine qatysty jalǵan aqparat tarady.