Mınıstr Qasymov sý tasqyny týraly: Sýdyń bıznes ekenin umytpaý qajet
ASTANA. QazAqparat - QR Іshki ister mınıstri Qalmuxanbet Qasymov sý tasqynyna sebep bolatyn negizgi máselelerdi atady, dep habarlaıdy QazAqparat tilshisi.
Mınıstrdiń aıtýynsha, qazirgi kezde sý tasqyny qaýpi bar oblystarǵa qyrýar qarjy bólinip jatyr. Sebebi ózen arnalaryn kúsheıtý jáne taǵy basqa sharalardy atqarý qajet.
«Ashyǵyn aıtaıyn, sý - ol bıznes. Olar toǵandardy salyp tastaıdy da, sýdy ustap otyrady. Mysaly, Qaraǵandyda barlyq sý qoımalary metallýrgııalyq kombınatqa qyzmet kórsetýge arnalǵan. Sý bolmasa, óndiris toqtap qalady. Ótken jyly qalaı boldy? Aýa raıy boljamy durys jasalmaǵannan keıin qoımalardyń ıeleri sýdy jınaı bergen, jınaı bergen. Al kún kúrt jylynyp ketkende qardyń sýy kóptep kele bastady. Olar aldy da, sýdy jibere saldy. Sodan ózen arnalary tasyp, tómende otyrǵan eldi mekenderdi sý basty», - dedi Q.Qasymov jýrnalısterge bergen suxbatynda.
Onyń aıtýynsha, búginde Ózbekstan men Qyrǵyzstannan keletin sýdyń kólemin baqylaý sharalary júrgiziledi. Alaıda tabıǵattyń tosyn syılary taǵy bar.
«Máselen, qazir Shyǵys Qazaqstan oblysy men Aıagózde bolǵan jaǵdaı - bul taza nonsens. Eki kúnniń ishinde jaýyn-shashynnyń bir aılyq mólsheri tústi. Buǵan deıin qatty aıaz boldy. Jer bir jarym metrge deıin qatyp qalǵan. Sodan sý jerge sińbeı, jan-jaqqa jaıylyp jatyr. Qaraǵandy oblysynda da solaı. Bul tek jaýyn-shashynnyń nátıjesi ǵana. Ózender áli tasyǵan joq. Endi, bıyl qar az boldy. Sondyqtan ózen arnalary qatty tasymaıdy degen úmit bar», - dep atap kórsetti Q.Qasymov.
