Mınıstr Qasymbek «tsıfrlyq fabrıkalardyń» úlgisin ázirleýge múddeli

ASTANA. QazAqparat - QR Investıtsııalar jáne damý mınıstri Jeńis Qasymbek aǵymdaǵy jylda birneshe kásiporynda sandyq tehnologııalardy keńinen engizýdi kózdeıdi, dep habarlaıdy QazAqparat tilshisi.

«Bıyl arnaıy saraptamanyń qorytyndysy boıynsha 7-10 pılottyq kásiporyn tańdalady. Ol jerde ozyq sandyq tehnologııalar engiziledi. Sóıtip, biz atalǵan tehnologııalardyń tıimdiligin kórsetýdi kózdeımiz. Bir sózben aıtqanda, atalmysh kásiporyndar basqa óndirister úshin «tsıfrlyq fabrıkalardyń» úlgisi ispetti bolmaq. Pılottyq jobalar boıynsha qolǵa alynatyn jumystar 2018 jyly da jalǵasatyn bolady», - dedi Qasymbek búgin mınıstrliktiń keńeıtilgen alqa májilisinde.

Sonymen qatar, sandyq tehnologııany engizý boıynsha júıequraýshy kásiporyndarmen de jumys kúsheıtilmek. Búginniń ózinde birqatar kompanııalar jańa sandyq sheshimderdi engizýge qyzyǵýshylyq tanytyp, iske kirisip te ketti. Bul jerdegi bosatylǵan jumys kúshi men eńbek naryǵyndaǵy ózgeristerdi boljaý esebinen sandyq tehnologııa negizinde jańǵyrtý josparyn ázirleý men júzege asyrýda mınıstrlik negizgi mindetterdi atqarady.