Mınıstr kásibı merekede SES mamandaryn marapattady
ASTANA. KAZINFORM – Bıyl alǵash ret, 15 qyrkúıekte sanıtarııalyq-epıdemıologııalyq qyzmet qyzmetkerleri ózderiniń kásibı merekesin atap ótip jatyr.
Densaýlyq saqtaý mınıstrligi málimetinshe, endi kúntizbedegi bul kún SES qyzmetkeriniń kúni retinde belgilenedi. Búginde respýblıka boıynsha 12 myńnan astam maman aýyz sýdyń, tamaq ónimderiniń sapasyn, qorshaǵan ortanyń jaı-kúıin baqylaı otyryp, ınfektsııalyq jáne ınfektsııalyq emes aýrýlardyń taralýyn boldyrmaı, halyqtyń sanıtarııalyq-epıdemıologııalyq salaýattylyǵyn qamtamasyz etedi.
QR Densaýlyq saqtaý mınıstri Aqmaral Álnazarova óziniń quttyqtaý sózinde SES mamandarynyń halyqtyń densaýlyǵyn qorǵaýdaǵy jáne bıologııalyq qaýipsizdikti nyǵaıtýdaǵy basty rólin atap ótti.
– Bolashaq saqtyq medıtsınasyna jatady - eki ǵasyr buryn aıtylǵan bul sóz tirkesi búgingi kúnge deıin ózekti bolyp qala beredi. Sizderiń jumystaryńyzdyń arqasynda elde qaýipti ınfektsııalar joıyldy, epıdemııalarǵa, sonyń ishinde COVID-19 pandemııasy kezinde senimdi tosqaýyl qoıyldy. Sizder táýlik boıy eldiń sanıtarııalyq-epıdemıologııalyq ál-aýqatyn qamtamasyz etesizder. Tańdalǵan iske batyldyqpen qyzmet etkenderińiz úshin barshańyzǵa alǵysymdy bildiremin, - dedi mınıstr.
Saltanatty is-sharada qyzmettiń 400-ge jýyq úzdik qyzmetkerleri men ardagerleri sanıtarııalyq-epıdemıologııalyq qyzmetti damytýǵa qosqan zor úlesi jáne kóp jylǵy adal eńbegi úshin memlekettik jáne vedomstvolyq nagradalarmen marapattaldy. Osylaısha, qyzmetkerlerge Premer-mınıstrdiń atynan 80 Alǵys hat jáne Densaýlyq saqtaý mınıstriniń 3 Qurmet gramotasy tabys etildi. Sanıtarııalyq dárigerler men epıdemıologtardyń qajyrly eńbegi «Eńbek ardageri» medaldarymen, «Densaýlyq saqtaý isiniń úzdigi» tósbelgilerimen jáne «Densaýlyq saqtaý isine qosqan úlesi úshin» tósbelgilerimen, bas memlekettik sanıtarııalyq dárigerdiń atynan alǵys hattarmen jáne Qurmet gramotalarymen marapattaldy.
Kóp jyldyq jumysy sanıtarııalyq-epıdemıologııalyq baqylaýdyń zamanaýı júıesin damytýdyń berik negizin qalaǵan qyzmet ardagerlerine erekshe nazar aýdaryldy.
– Sizderdiń eńbekterińiz memlekettik sanıtarııalyq-epıdemıologııalyq qyzmetke densaýlyq saqtaý júıesiniń negizgi quramdas bóligi bolýǵa múmkindik berdi, al tájirıbe dástúrlerdi saqtaýǵa kómektesedi jáne jas mamandarǵa úlgi bolady, — dep atap ótti A.Álnazarova.
Búgin Qazaqstanda alǵash ret sanepıdemıologter kúni atalyp ótetinin jazǵan edik.