Mınıstr karantındi buzǵandarǵa salynatyn aıyppul nelikten kóbeıgenin túsindirdi

NUR-SULTAN. QazAqparat – Ádilet mınıstri Marat Beketaev kóktemgi karantınde qazirgi, ıaǵnı jazǵy karantındegideı aıyppul nelikten salynbaǵanyn túsindirdi, dep habarlaıdy QazAqparat tilshisi.

«Ózderińiz biletindeı, koronavırýs indetine baılanysty elimizde karantın sharalary uzartyldy. Azamattar, bıznes pen memlekettik organdar qosymsha shekteý sharalaryn saqtaýǵa mindetteldi. Shekteý sharalary buzylǵan jaǵdaıda naqty ári arnaıy ákimshilik jáne qylmystyq jaýapkershilik bar. Ádilet mınıstrligine bul turǵyda kóp suraq túsip jatyr», - dedi Marat Beketaev OKQ-da ótken baspasóz máslıhatynda.

Mınıstrdiń aıtýynsha, halyq kóbine «kóktemgi karantın sharalarynan qazirgi karantın sharalary nesimen erekshelenedi?» degen suraqty qoıady.

«Álbette, bul rette quqyqtyq rejım de erekshelenedi. Óıtkeni kóktemde azamattarǵa úıde qalyp, asa qajettilik týyndaǵan jaǵdaıda ǵana syrtqa shyǵý kerektigi týraly keńes berildi. Al qazir ekonomıka qatty zardap shekpes úshin bul sharalar ózgertildi. Qataıa tústi. Qazirgi ýaqytta bul erejeler qoǵamdyq oryndaǵy, jabyq nysandardaǵy jáne kóliktegi azamattardyń áreketine baılanysty. «Olar ózin qalaı ustaýy kerek? Erejeni buzsa, qalaı jazalanady? Zańbuzýshyǵa qandaı ákimshilik jaza taǵaıyndaý kerek?» degen suraqtar tóńireginde pikirtalas kóp boldy. Kóktemde QR ÁQBjK 476-baby qoldanylsa, qazir 425-bap boıynsha azamattar jazalanyp jatyr», - dedi ol.

Marat Beketaev osyndaı jaýapkershiliktiń quqyqtyq negizi turǵysynda zańgerler birshama qyzý pikirtalasqa túskenin jetkizdi.

«Jaýap qarapaıym: bul normanyń, baptyń dıspozıtsııasy – zańnamanyń buzylýyna silteme jasaıdy. Osy karantın sharalaryn engizý barysynda mundaı jaýapkershilik zańnamada bolmady. Dál osy jaǵdaı pikirtalas týǵyzdy. Bul talaptar keıinnen Densaýlyq saqtaý mınıstriniń 5 shildedegi buıryǵyna sáıkes sanıtarlyq talaptarda naqty kórsetildi. Ony oqymaǵan adamdar «bul ne qylǵan erejeler?» dep jatyr. Bul aınalamyzdaǵy talaptar – áleýmettik qashyqtyqty saqtaý, maska kııý, sanıtaızer ornalastyrý talaptary. Bul – bireý jasyryp turǵan arnaıy erejeler emes», - dedi ol.

Eske sala ketsek, shilde aıynyń basynda QR Premer-Mınıstriniń orynbasary Eraly Toǵjanov karantın rejımin buzǵandarǵa aıyppul salynatynyn aıtqan bolatyn.

«Karantın rejımi men sanıtarlyq-epıdemıologııalyq talaptardy buzǵany úshin ákimshilik jaýapkershilikke tartylǵan jeke tulǵalar 30 aılyq eseptik kórsetkish (1 AEK - 2778 teńge / 30 AEK - 83 340 teńge), al kásipkerlik sýbektileri 230 AEK (638 940 teńge) kóleminde aıyppul tóleıdi», - dedi E. Toǵjanov Ortalyq kommýnıkatsııalar qyzmetinde.