Mınıstr Qaraǵandyda ýlanǵan balalardyń jaǵdaıyn aıtty

ASTANA. QazAqparat – Densaýlyq saqtaý mınıstri Ajar Ǵınııat Qaraǵandy oblysyndaǵy arnaýly áleýmettik qyzmet kórsetý ortalyǵynda ýlanǵan balalardyń jaǵdaıy týraly aıtyp berdi, dep habarlaıdy QazAqparat tilshisi.

«Búgingi tańda 13 balanyń altaýy aýrýhanada jatyr. Olardyń jaǵdaıy aýyr. Balalar reanımatsııa, qarqyndy terapııa bólimshesine ornalastyryldy. Ekeýiniń jaǵdaıy aýyr ári turaqsyz», - dedi Ajar Ǵınııat úkimet aıasynda.

Onyń aıtýynsha, tergeý sharalary áli júrgizilip jatyr, tekserý aıaqtalǵan joq.

«Sot-medıtsınalyq saraptamasy áli aıaqtalǵan joq, qorytyndy shyǵarylmady. Balalar emdelýde. Dárigerler boljam jasamaıdy, biraq alty balanyń tórteýi jaqsaryp keledi», - dep túıindedi mınıstr.

Esterińizge sala keteıik, 30 shildede Qaraǵandy oblysynyń balalarǵa arnaýly áleýmettik qyzmet kórsetý ortalyǵynda birneshe bala ýlanyp, onyń bireýi qaıtys boldy, altaýy jansaqtaý bóliminde jatyr.