Mınıstr Qaraǵandydaǵy polıtsııa beketinen tabylǵan áıel adamnyń máıiti týraly pikir bildirdi

ASTANA. KAZINFORM – Qoǵamdaǵy qaýipsizdik pen tártipti qamtamasyz etý máselelerine arnalǵan kóshpeli Úkimet saǵatynda Іshki ister mınıstri Erjan Sádenov Qaraǵandydaǵy polıtsııa beketinen tabylǵan áıel adamnyń máıiti týraly pikir bildirdi.

- Óńirlerde keıbir ýchaskelik ınspektorlardyń ózi qylmystyq istiń fıgýranty bolyp jatyr. Mysaly, Aqtóbe oblysynda 1 mln teńgeni ıemdengen. Soltústik Qazaqstanda ýchaskelik ınspektory alaıaqtyq úshin sottaldy. Jetisý oblysynda ýchaskelik ınspektor 27 mln teńgeniń zattaı aıǵaqtardy urlaǵan. Shymkentte ınspektor bodı-massaj salonyna «qamqorlyq kórsetkeni» úshin aqsha alyp otyrǵan. Batys Qazaqstan oblysynda ýchaskelik ınspektor qol kóterýge áýes bolǵan. Al Qaraǵandydaǵy polıtsııa beketinde áıel adamnyń máıiti tabyldy. Al ýchaskelik ınspektordyń ózi esi-tússiz kúıde jatqan. Osylardyń sebebi nede jáne endi qaıtalanbaý úshin ne istep jatyrsyzdar? - dep surady depýtat Baqytjan Bazarbek.

Erjan Sádenov antyna adal emes ınspektorlar bar ekenin moıyndady.

- Ýchaskelik ınspektorlar týraly aıtqanyńyzdaı jaıttar bolǵany ras. Biraq siz aıtqan faktiler, meniń esimde bolsa, bir jylda ǵana bolmaǵan. Mysaly, Aqtóbedegi jaǵdaı 2017 jyly álde 2018 jyly ma bolǵan. Másele onda da emes. Ókinishke qaraı, polıtsııa qyzmetkeriniń árbiri antyna adal emes. Onyń ishinde ýchaskelik ınspektorlar da bar. Siz aıtqan faktiler rasymen bolǵan. Eki nárseni aıta ketkim keledi. Bul jan aýyrtady, - dedi ol.

Sondaı-aq, mınıstr ІІM ofıtserleriniń sapasyna 2018 jyly kadrlyq saıasattyń ózgerýi de túrtki bolǵanyn atap ótti.

- Biz jyl saıyn 6 myńdaı qyzmetker alamyz. Óıtkeni bir toby zeınetke shyǵyp turady. 2018 jylǵa deıin 4 akademııa bolsa, qazir 5 akademııa bar. Bir ınstıtýt pen eki oqytý ortalyǵy bar. Olar kýrsanttar daıarlaıtyn. ıAǵnı 4 jyl boıy ofıtserlerdi daıarlaıtyn. 2018 jyly osy tájirıbe joıyldy. Qazir jylyna 200 kadrlyq ofıtser ǵana daıarlaımyz. Qalǵanyn joǵary bilimdi adamdardan tartyp, 1-2 aıdyń ishinde qaıta daıarlaýdan ótkizemiz. 2 aıdyń ishinde azamattyq sanattaǵy adamdy polıtseıge aınaldyrý múmkin emes shyǵar. Bir sebebi osynda shyǵar. Ol týraly Prezıdentke de aıttyq. 2028 jyldan bastap jyl saıyn 1000-nan astam kýrsanttar túlep shyǵatyn bolady. 2031 jyly olardyń sany 1800-ge jetedi, - dedi ІІM basshysy.

Eske salsaq, 1 qazan kúni Qaraǵandydaǵy polıtsııa pýnktinen áıeldiń máıiti tabylǵanyn jazǵan edik.