Mınıstr ІІM reformalaý týraly aıtty
ALMATY. QazAqparat - Qazastan Respýblıkasynyń Іshki ister mınıstri Qalmuhanbet Qasymov vedomstvodaǵy reformalar týraly aıtty, dep habarlaıdy QazAqparat tilshisi.
«2016 jyly jergilikti polıtsııa qyzmetin qurǵanymyzdy bilesizder. Óte durys sheshim boldy. Nege deısizder ǵoı? Biz ІІM-de otyramyz, sondyqtan polıtsııa beketin qoıatyn jerdi, kameralardy qaıda ornatý kerek ekenin qaıdan bilemiz? Sondyqtan da barlyǵyn jergilikti ózin-ózi basqarý organyna tapsyrdyq. ıAǵnı, qala bıligi qaı jerlerge, qandaı, qansha kameralar qoıý kerektigin, patrýldik polıtsııa qyzmetin qoıatyn jerlerdi anyqtaýy kerek bolǵan. Munyń barlyǵy uıymdastyrylýy kerek edi», - dedi mınıstr Qazaqstan men Reseıdiń Іshki ister mınıstrlikteriniń birikken alqa otyrysynyń nátıjesi boıynsha ótken brıfıngte.
Mınıstr dál qazir vedomstvo Almatynyń Іshki ister departamentiniń qyzmetin baqylap otyrǵanyn aıtty.
«Biz sońǵy 4-5jyl boıy reformalar júrgizip kelemiz. Jan-jaqty polıtseıdi daıyndaý úshin jumystar jasaýdamyz. Bul baǵytta patrýldik jáne jol polıtsııasyn biriktirdik. Ne úshin? Jolda polıtseıler az bolý úshin, dál osy polıtseılerdi turǵyn úı alaptaryna kóshirý úshin. Jergilikti polıtsııa dál osy máselemen aınalysýy tıis edi. Bul ary qaraı da jetilýdi talap etetin baǵyttardyń biri», - dedi mınıstr
Sondaı-aq, Q. Qasymov mamyr aıynda Qaýipsizdik keńesiniń ótkenin atap aıtty. Jıyn barysynda Memleket basshysy quqyq qorǵaý júıesin, sonymen qatar, Іshki ister mınıstrligin reformalaýǵa qatysty tapsyrma bergen.
«Sizderge Prezıdent Ákimshiliginde reformalaý boıynsha usynystar ázirlep jatqan úsh top qurylǵanyn aıtqym keledi. Olardyń biri Іshki ister mınıstrligine qatysy. Onda ońtaılandyrý, qysqartý, zańnamadaǵy ózgeristerge qatysty máseleler qarastyrylady. 1 qyrkúıekte Elbasyna barlyq usynystar týraly baıandap berýimiz kerek. Ol jerge Almatynyń qoǵamdyq keńesi jibergen usynystar qarastyrylatyn bolady», - dep túıindedi mınıstr.
