Mınıstr gazdy únemdep paıdalanbaıtyn qazaqstandyqtardy synǵa aldy

ASTANA. QazAqparat – Gazdy únemdi tutyný jóninde tetik engizý qajet. Bul týraly búgin Úkimet otyrysynda Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Halyqty gazdandyrý boıynsha belsendi jumyspen qatar energııa resýrsy retinde gazdy utymdy, únemdep tutyný mádenıetin engizý qajet ekenin de atap ótkim keledi. Taldaý kórsetkendeı, eldiń jyly aımaqtary ortasha temperatýrasy áldeqaıda tómen aımaqtarmen birdeı deńgeıde gaz tutynady», - dedi Bolat Aqsholaqov.

Onyń atap ótýinshe, 2022 jyly zańnamalyq túrde tutynýshylardyń 2 jańa sanaty – iri kommertsııalyq tutynýshylar jáne tsıfrlyq maınıngti júzege asyratyn tulǵalar engizildi.

Bul is-sharalar ónerkásiptik kásiporyndardyń energııa tıimdiligin arttyrýǵa ákeledi.

«Osy jyly ataýly áleýmettik kómek alatyn tutynýshylardy qospaǵanda, turmystyq jáne kommýnaldyq-turmystyq tutynýshylar úshin gazdy únemdi tutyný jónindegi tetikti engizý múmkindigin qarastyrý usynylady», - dedi mınıstr.