Mınıstr Ǵanı Beısembaev Shymkent turǵyndarynyń jeke máselelerin tyńdady
ShYMKENT.KAZINFORM — Oqý-aǵartý mınıstri Ǵanı Beısembaev Shymkent qalasyna jumys saparymen bardy. Aldymen mektep dırektorlary, bilim bólimi men basqarma basshylarynyń qatysýymen bilim berý salasyndaǵy ózekti máselelerge arnalǵan keńes ótkizdi. Keıin Oqý-aǵartý mınıstri azamattardy jeke qabyldady. Bul týraly vedomstvonyń baspasóz qyzmeti habarlady.
Keńeste bilim berý salasyndaǵy ózekti máseleler talqylandy. Atap aıtqanda, PISA jahandyq zertteý jáne MODO ishki baǵalaý júıesiniń qorytyndysy boıynsha Shymkent qalasyndaǵy mektepterdiń nátıjelerine qatysty suraq kóterildi.
Tejeýshi faktorlardy anyqtaý úshin Oqý-aǵartý mınıstrligi segiz negizgi baǵyt boıynsha bilim berý uıymdarynyń qyzmetine keshendi taldaý jáne baǵalaý júrgizdi. Bul kadrlyq quram, bilim alýshylar kontıngenti, quryltaı jáne quqyq belgileıtin qujattardyń bolýy, Oqý protsesi, tárbıe jumysy, oqý-materıaldyq aktıvter, bilim alýshylarǵa jaǵdaı jasaý jáne qaýipsizdikti qamtamasyz etý.
«Mınıstrlik bilim berý sapasyn arttyrýǵa jáne sybaılas jemqorlyq táýekelderin joıýǵa baǵyttalǵan birqatar iri jobalardy iske asyrdy. Bizdiń ortaq maqsatymyz – balalarǵa sapaly bilim men sanaly tárbıe berý. Ol úshin jalpyadamzattyq jáne ulttyq qundylyqtarǵa negizdelgen durys baǵdarlardy anyqtaý qajet. Tekserý nátıjeleri boıynsha bilim basqarmasy túbegeıli sharalar qabyldaýy qajet», - dedi Ǵanı Beısembaev.
Esterińizge sala keteıik, bilim berý salasyndaǵy ózekti máselelerdi júıeli túrde sheshý úshin mınıstrlik ótken jyldan bastap elimizdiń barlyq óńirlerinde bilim berý aýdıtin qaıta bastady. Alǵashqy taldaý nátıjeleri boıynsha usynystar berildi. Sonymen qatar, ótken jyldyń sáýir aıynda sybaılas jemqorlyqqa qarsy is-qımyl agenttigimen birlesip bilim berý salasyndaǵy bıýdjet qarajatyn josparlaý jáne ıgerý máseleleri boıynsha sybaılas jemqorlyq táýekelderine syrtqy taldaý júrgizildi. Onyń qorytyndysy boıynsha sybaılas jemqorlyq táýekelderin joıýǵa baǵyttalǵan tetikterdi ázirleý jónindegi keshendi jospar iske asyrylyp jatyr.
Mınıstr Ǵanı Beısembaev qala turǵyndarymen esep berý kezdesýinen keıin azamattardy jeke qabyldady.
Turǵyndar jumysqa ornalasý, mektepke deıingi, orta, tehnıkalyq jáne kásiptik, ınklıýzıvti, qosymsha bilim berý, pedagog kadrlardy daıarlaý jáne sapasyn arttyrý jáne t. b. máselelerimen mınıstrge júgindi.
Ǵanı Beısembaev barlyq ótinishterge tolyq túsinikteme berdi. Qaraýǵa qosymsha ýaqytty qajet etetin máseleler jeke baqylaýǵa alyndy. Komıtetter men qurylymdyq bólimshelerdiń basshylaryna tıisti tapsyrmalar berildi.
Aıta keteıik, azamattardy jeke qabyldaý óńirlerde de, Mınıstrlikter úıindegi azamattardy qabyldaýdyń mamandandyrylǵan ortalyǵynda da ótedi. Ótken jyldyń qorytyndysy boıynsha mınıstr barlyǵy 500-den astam azamatty jeke qabyldady. Bul sharalar bıyl da jalǵasady.
