Mınıstr Fly Arystan avıakompanııasy qashan iske qosylatynyn aıtty

ASTANA. QazAqparat - 2019 jyldyń birinshi jartyjyldyǵynda tómen bıýdjetti Fly Arystan ulttyq avıakompanııasy iske qosylady. Bul týraly búgin Úkimettiń keńeıtilgen otyrysynda Indýstrııa jáne ınfraqurylymdyq damý mınıstri Jeńis Qasymbek aıtty, dep habarlaıdy QazAqparat tilshisi.

«Azamattyq avıatsııada kórsetkishterdiń turaqty ósimi baıqalýda. Máselen, tranzıttik jolaýshylar sany 2010 jyly 20 myńnan 2018 jyly 900 myńǵa deıin ósti. 2020 jyly tranzıttik avıajolaýshylar sany 1,6 mln adamdy quraıtyn bolady», - dedi mınıstr.

Onyń atap ótýinshe, aǵymdaǵy jyldyń birinshi jartyjyldyǵynda QR Prezıdentiniń tapsyrmasy boıynsha alǵashqy ulttyq tómen bıýdjetti Fly Arystan avıakompanııasyn iske qosý josparlanǵan.

«Alǵashqy jyly paıdalanýda 1 mln jolaýshyǵa deıin tasymaldaý josparlanýda, bul «Eır Astananyń» baǵasynan 2 ese tómen. Kólik salasyn damytý boıynsha alǵa qoıylǵan mindetterdi odan ári iske asyrý 2025 jylǵa deıingi «Nurly jol» baǵdarlamasynda kórinis tabatyn bolady», - dedi Jeńis Qasymbek.

Eske sala keteıik, buǵan deıin «Fly Arystan» bıletteri basqa kompanııalardan 2-2,5 ese arzan bolatyndyǵy týraly habarlaǵan bolatynbyz.