Mınıstr Eýrazııalyq odaqtyń Qazaqstandaǵy qymbatshylyqqa áseri týraly aıtty

NUR-SULTAN. QazAqparat – QR Premer-Mınıstriniń orynbasary – Saýda jáne ıntegratsııa mınıstri Baqyt Sultanov Qazaqstandaǵy qymbatshylyqqa áser etip otyrǵan Eýrazııalyq ekonomıkalyq odaq aıasyndaǵy kedergilerdi atady, dep habarlaıdy QazAqparat tilshisi.

«Saýda seriktestigi kezinde ekonomıkalyq odaqqa múshe elderdiń bir-birine qoıatyn kedergisi uıym asyndaǵy jıyndarda eń kóp talqylanady. Eýrazııalyq ekonomıkalyq komıssııada, úkimetaralyq otyrystarda, prezıdentter qatysatyn jıyndarda da solaı. Búgingi tańda kedergilerdiń birjaqty qoıylatyn sátterin jıi kóremiz. Onyń ishinde tehnıkalyq, ıaǵnı tarıftik emes kedergiler de bar. Máselen, Reseı Federatsııasynyń belgili bir oblysy kedergi qoısa, biz olardy sol mezette alyp tastaýǵa tyrysamyz», - dep túsindirdi ol Úkimet kýlýarynda.

Mınıstrdiń aıtýynsha, byltyr qarashada odaq aıasynda taýar aınalymy 800 mln dollardy quraıtyn 6 kedergi joıylǵan.

«Kedergilerdiń túri kóp. Mysaly, gýbernatorlardyń keıbiri saýda sóresine qoıylatyn taýarlarǵa shekteý qoıýy múmkin. Temirjol ákimshiliginiń shekteýleri bar. Shekarada da qosymsha talap ta paıda bolyp jatady. Onyń bári taýar baǵasyna áser etedi. Alaıda onyń árqaısysyn kedergi dep tanýdyń ózine de ýaqyt kerek. Eýrazııalyq ekonomıkalyq komıssııa aıasynda tekserilip, arnaıy tergeý de uıymdastyrylýy kerek», - degen vedomstvo basshysy. Qazir odaq aıasyndaǵy kedergiler teketiresine uıymǵa múshe elderdiń bári atsalynys jatqanyn atap ótti.

«Bári kedergi qoıady. Eń mańyzdysy, olardy tek anyqtaý qajet. Qazaqstanyń, Belarýs eliniń, Qyrǵyzstannyń, Armenııa nemese Reseıdiń úkimetteri shyǵarǵan qaýlylardy jiti qaraǵan abzal. Eger múshe memleketter qabyldaǵan sheshimder ózara saýdany shektese, onyń bárin kedergi dep tanýǵa bolady«, - dedi Baqyt Sultanov.

Buǵan deıin QR Prezıdenti Qasym-Jomart Toqaev Qazaqstannyń Eýrazııalyq ekonomıkalyq odaqtan shyǵýy týraly tarap júrgen qaýesetke jaýap bergen edi.